ЈАСНО - Кепенци

ЈАС ОСВЕН ХРИСТА НИШТО НЕМАМ – НОВА КНИГА ЗА НОВАТА СВЕТИТЕЛКА НА МПЦ, ПРЕПОДОБНАТА СТЕФАНИДА

Editor — Fri, 07 Jun 2024 11:12:23 +0000

Во пресрет на канонизацијата на новата македонска светителка, преподобната маченичка Стефанида Битолско-Скадарска, во издание на Сестринството на Слепченскиот Манастир Св. Јован Претеча, излезе од печат книгата насловена

„ЈАС ОСВЕН ХРИСТА НИШТО НЕМАМ“

Во книгата за првпат на македонски јазик се преведени и нејзините исповедни писма, а исто така, се објавени и нови сознанија кои се однесуваат на нејзиниот живот, мачеништвото и пронаоѓањето на моштите. Во книгата поместени се и службата и акатистот на преподобната Стефанида на македонски и црковнословенски јазик.

Прославата за нејзиното впишување во диптихот на Светиите, со одлука на Светиот Синод на МПЦ е закажана за 29 и 30 јуни, во Манастирот Свети Јован Претеча во демирхисарското село Слепче и во соборниот храм на светиот великомаченик Димитриј во Битола.

По големата Божја милост, за прослава на Бога преку Неговите Светии, излезе од печат нова книга на Сестринството на Слепченскиот Манастир Св. Јован Претеча, насловена „ЈАС ОСВЕН ХРИСТА НИШТО НЕМАМ – Света преподобномаченичка Стефанида Битолско-Скадарска“.

Во книгата е направена споредба на духовниот лик на Светата Стефанида со учењето и опитот на Светите Отци и преподобните Мајки на Црквата. Преку нејзиниот живот во Христа, таа ни остава поука за живата ни Црква, и нѐ уверува дека се возможни таквите подвизи и животот во Духот и денес, по зборовите на преподобниот Нил Сорски, кој вели: „А оние кои усрдно се каат, кои со голема љубов и страв Го призиваат Бога и само на Него гледаат, и ги следат Неговите заповеди, – сите такви Господ ги прима, ги љуби, им ја дарува благодатта Своја и ги прославува.“

Охристовената душа на Светата Стефанида ни се објавува како светило кое „им свети на сите в куќи“ и ги стоплува нашите души за прослава на Бога и ние ја препознаваме како смирена подвижничка, богобарателка, тихувателка, пустиножителка насреде градот, усрдна молитвеничка, на која Бог ѝ подари и венец на мачеништво. За прв пат преведени на македонски јазик се и нејзините исповедни писма, а исто така, во книгата се објавени и нови сознанија кои се однесуваат на нејзиниот живот и мачеништво, како и за пронаоѓањето на нејзините чесни мошти. Во книгата поместени се и службата и акатистот на македонски и црковнословенски јазик.

Оваа книга е своевидно запознавање со копнежливата душа на Преподобната и со нејзиното непоколебливо тежнеење кон Христа. Упивајќи ги нејзините повици: “Христе мој животе!“ „Без Тебе ништо живо, неможе живо да биде!“и „Смрт со Тебе нема, туку небесна светлина и вечно веселие!“, ние воскликнуваме: Света преподобномаченике Стефанида, моли Го Бога за нас!

Прославата за нејзиното впишување во диптихот на Светиите ќе биде на 29 и 30 јуни 2024 година, во Слепченскиот Манастир и во градот Битола..

Слава на Бога Троичниот, Отецот Синот и Светиот Дух, сега и во вековите на вековите! Амин!

– Пишува во објавата по повод новата книга на сестринството на Слепченскиот Манастир Свети Јован Претеча.

Извор: Слепченски Манастир

The post ЈАС ОСВЕН ХРИСТА НИШТО НЕМАМ – НОВА КНИГА ЗА НОВАТА СВЕТИТЕЛКА НА МПЦ, ПРЕПОДОБНАТА СТЕФАНИДА first appeared on Кепенци.

Архиепископ г.г. Стефан: Со кое право некои ни ги одрекуваат историјата и традицијата, јазикот и верата?

Editor — Mon, 06 May 2024 20:10:38 +0000

Возљубени чеда на Мајката Македонска Црква,
Доколку се обѕрнеме во нашето историско раздобје, ќе воочиме огромни подеми и падови, како на црковен, така и на национален план. Впрочем, македонскиот народ, со Божја помош и поткрепа, успевал и сè уште успева достоинствено да ги извојува сите битки и да им одолее на сите непријателски настроенија, исполнети со лукави намери и со зли цели; и, притоа, со крената глава да продолжи по патот кон Бога – кон Изворот на добрините и на правдата.
Та, кој ќе се осмели да нè оспори како македонски народ и како македонска држава!? Со кое право некои сè уште се обидуваат да ни ги одрекуваат историјата и традицијата, јазикот и верата, кога сета македонска почва е напоена со просветителските дејанија на македонските црковно-просветни дејци, со истрајноста на сите наши родобранители, со крвта на недобројните наши маченици и со благоверието на мноштвото исповедници и поборници за зачувување на православието на ова свето македонско тло!? Но, како што не потклекнаа нашите прадедовци, така и ние – како нивни потомци и како доследни пазители на аманетот доверен од нив – да не дозволиме отстапки пред оние што постојано посегнуваат по нашето најсвето; пред оние што гледаат да го зграбат она што со векови макотрпно е градено и кое е сочувано до денешни дни. Наша должност и обврска треба да ни биде да им се спротивставуваме на сите оние што на секаков начин се трудат да ни го одземат она за кое се дадени многу жртви и кои се желни да ни ги приграбат: и историјата, и земјата, и културата, и јазикот и сè што е наше – македонско.
Затоа, што е можно побрзо, да се освестиме и да се обединиме како народ, и молитвено да притекнеме кон Бога и кон закрилникот на нашата најсвета автокефална Охридска и Македонска црква – кон светиот Климент Охридски, та, по примерот на нашите предци, да се избориме со сите неприлики со кои катадневно се соочуваме. Но сето ова ќе го постигнеме само ако си ги зацврстиме единството, слогата и сплотеноста, односно само ако трајно ги надминеме внатрешните разногласија и меѓусебните поделби и несогласувања.

The post Архиепископ г.г. Стефан: Со кое право некои ни ги одрекуваат историјата и традицијата, јазикот и верата? first appeared on Кепенци.

МИТРОПОЛИТ ПЕТАР: ДА НАПРАВИМЕ ВИСТИНСКИ ИЗБОР МЕЃУ ДОБРОТО И ЗЛОТО

Editor — Sun, 05 May 2024 13:25:54 +0000

Најмили наши чеда во Христа Преобразителот и Спасителот!

Во оваа Светла Воскресенска Седмица, во нашата земја Македонија се одржуваат избори. Граѓаните на Македонија ќе изберат Претседател на државата и пратеници во Парламентот. Нашиот народ е мудар и знае да направи правилен избор. На новоизбраниот Претседател, пратениците и на Владата, им посакуваме успех во извршувањето на одговорните задачи за добробитот на сите граѓани на нашата Татковина. Како одговорни за извршувањето на вашата должност, особено вам на православните пратеници, ви укажуваме да не заборавите дека доследно и крајно одговорно треба да се грижите, да не бидат во ништо запоставени духовните, културните, националните и општочовечките вредности, кои извираат од учењето на нашата Света Православна Вера и Црква.

Не заборавајте при донесувањето на врвните одлуки за доброто на граѓаните и општеството да се сообразувате со погоре посочените упатства, имајќи ги предвид зборовите на апостолот Петар и другите Апостоли: „Повеќе треба да Му се покоруваме на Бога, отколку на луѓето“ (Дела 5, 29), односно да се спротивставите, по секоја цена, на сè што е спротивно на Божјите и природните закони, како и на Божјата волја, заради вашето и спасението на сите луѓе.
Граѓаните, пак, особено оние од Православна вера, секогаш да имаат при ум дека се царско свештенство и избран народ, и затоа должни се да гласаат и изберат претставници и водачи кои што се одликуваат со морални вредности и ги исполниле или ќе ги исполнат ветувањата, за да не се случи втората измама да биде полоша од првата, т.е. слепец слепи да води. Во спротивно, гласачите виновни ќе бидат пред својата совест, која е гласот Божји во човекот.

Празникољубци! Во оваа прилика, сакаме да обрнеме внимание и да укажаме на еден друг, уште побитен, посуштински и спасоносен избор.

Имено, ние како слободни битија, создадени по Божјиот образ и подобие, го поседуваме дарот на слободната волја и имаме можност слободно да одлучуваме и избираме. Во нашиот живот често сме биле пред избор, уште од најмала возраст. Така, избиравме која играчка ја сакаме, со кои другарчиња ќе играме и ќе се дружиме, кој спорт ќе го избереме, во кое училиште ќе се запишеме, на кој факултет ќе студираме, кого или која ќе ги избереме за брачен другар/ка, какво возило, стан или куќа ќе купиме итн. Сето ова е во ред.

Но, пред секој човек, пред секој од нас, во овој живот, се поставени неколку клучни избори: ќе избереме добро или зло; вистина или лага; светлина или темнина; живот вечен или духовна смрт; Бога или ѓаволот?

Кога сме пред овој избор, да се потсетиме на Христовите зборови: „Јас Сум Патот, Вистината и Животот“ (Јован 14, 6). „Јас Сум добриот Пастир, Кој ја полага душата Своја за овците“ (Јован 10, 11); „Јас сум Светлината на светот; кој врви по Мене нема да оди во темнина, а ќе има светлина во животот“ (Јован 8, 12); „Зашто Бог толку го возљуби светот, што го даде Својот Единороден Син, та секој што верува во Него да не загине, туку да има живот вечен“ (Јован 3, 16). И сега, ќе се одлучиме ли да Го следиме Бога и да се уподобуваме на Него, или, пак, ќе се одлучиме за спротивното т.е. ќе ја искористиме ли нашата, од Бога дарувана слобода, за да го следиме ѓаволот, отфрлајќи Го Бога.

Богочовекот Исус Христос го победи ѓаволот, гревот и смртта. И тоа, ги победи заради нас. И воскресна, обезбедувајќи ни живот вечен. Ѓаволот, неговите демони, гревот и смртта се поразени. Наше е само слободно, со вера и на дело, да избереме; дали ќе учествуваме во победата на Христа Воскреснатиот, или, во поразот на ѓаволот. Никакви други победи или порази, не се толку важни на овој свет, и никаков друг посуштински избор немаме. Значи, или ќе бидеме со Христа и Неговата Црква или со ѓаволот и неговите лажни, телесни, преодни и минливи уживања и наслади во овој свет. Одлуката е само наша. Затоа да направиме вистински избор меѓу доброто и злото, меѓу Бога и ѓаволот, прифаќајќи ги доброто и Бога, а отфрлајќи го злото и ѓаволот. Ако го направиме тој избор, ние навистина ќе бидеме слободни, бидејќи нема да му робуваме на злото и ѓаволот.

Возљубени чеда во воскресенската радост!

Христос нашиот Бог беше жртвуван за нас, како Јагне заклан беше, и подаден на сите верни, заради простување на гревовите и живот вечен. Ете, и сега и во иднина, нè повикува сите да пристапиме кон приготвената Божја трпеза, на која е Он, Божјото Јагне. Да земеме учество во Пасхата; да не се лишуваме од оваа спасоносна и неискажлива Тајна; да пристапиме и да се насладиме со Животворниот Леб и Животворниот пијалок – Телото и Крвта Христови. Ете, со таква гозба, со таква трпеза, со такво празнување нè угостува Оној, Кој заради нас претрпе страдања, умре и Воскресна.

Да се радуваме возљубени празникољупци и да се прегрнеме еден со друг; да се просветлиме и да си простиме сè заради Воскресението. Амин!

Христос Воскресна! Навистина Воскресна!

Ваш постојанен молитвеник пред Христа Воскреснатиот,
Митрополит Преспанско-пелагониски и
Администратор Австралиски и Новозеландски
† Петар

The post МИТРОПОЛИТ ПЕТАР: ДА НАПРАВИМЕ ВИСТИНСКИ ИЗБОР МЕЃУ ДОБРОТО И ЗЛОТО first appeared on Кепенци.

УНЕСКО СО БАРАЊЕ ДО ОХРИД: ДА СЕ ДОСТАВИ ДОКУМЕНТАЦИЈА ЗА ИЗГРАДБА НА ХОТЕЛОТ ВО „ГОРИЦА”

Editor — Sat, 04 May 2024 10:23:09 +0000

Националната комисија на УНЕСКО денеска одржа седница на која беше разгледана актуелната состојба со изградба на хотелски комплекс на туристичкиот локалитет „Горица” во Охрид. Членовите на Комисијата донеле заклучоци со барања до Општина Охрид, како надлежен орган, за доставување на целокупната документација околу изградба на предметната локација. Како што соопштија од Министерството за култура, седницата се одржала на иницијатива на министерката Бисера Костадиновска-Стојчевска. Министерката посочила дека со оглед на надлежноста и одговорноста што Комисијата ги има, ова тело не смее да остави простор за изигрување на постојаната законска регулатива, поврзана со заштитата на светското природно и културно наследство. Од Министерството посочуваат дека по добивање на потребната документација и информациите од Општина Охрид, Националната комисија на УНЕСКО ќе се произнесе со свои заклучоци и препораки во однос на изградба на хотелски комплекс на „Горица”.

The post УНЕСКО СО БАРАЊЕ ДО ОХРИД: ДА СЕ ДОСТАВИ ДОКУМЕНТАЦИЈА ЗА ИЗГРАДБА НА ХОТЕЛОТ ВО „ГОРИЦА” first appeared on Кепенци.

Митрополит Петар – Ако се откажеме од дијаспората ќе исчезнеме (ВИДЕО)

Editor — Wed, 18 Jan 2023 01:20:14 +0000

Без условувања за откажување од дијаспората по никоја цена

Наместо егзархии – „подворја” (со соодветен реципроцитет)

Без етикатирањa, табу-теми и отворено да си ги решиме проблемите дома, за кои погрешно мислиме дека ни доаѓаат однадвор

Ова накусо се дел од поентите кои Митрополитот Преспанско-пелагонски и администратор Австралиски и Новозеландски, кои како Претседател на Одделот за надворешни односи со другите помесни цркви на САС на МПЦ ОА ги изнесе во емисијата „Гласот на народот” на Телевизија Сонце.

Како аргумент за неоткажување од дијаспората, за што владиката Петар смета дека треба да се има разбирање, тој го посочи примерот на Антиохиската црква, чие седиште е во Дамаск, а над 70% од нејзините членови се наоѓаат надвор од Сирија.

Посочувајќи дека во денешните околности на иселување МПЦ без дијаспора нема да може ни да опстои, заговорниците за откажување од дијаспората тој ги нарече „гробари” на црквата, народот и државата:

Во врска со идејата за поставување на „егзарх“ (самостоен застапник) на Цариградската Патријаршија или на било која друга помесна црква во Македонија, без можност за возвратна реципрочност, за владиката Петар е дискутабилно и наликува на обид за полагање рака за влијание.

Според него, поставувањето на т.н. „подворја” во вид на дипломатски црковни претставништва или испостави, на посебно доделени територии, на пример во Охрид, на кои другите помесни цркви ќе можат да градат и свои храмови, е посоодветна идеја која ќе значи и примена на единството и сослужувањето во пракса, дотолку повеќе ако се обезбеди и соодветна возвратност за отворање на подворја на МПЦ ОА на териториите на другите помесни цркви.

Митрополитот Петар за првпат јавно и директно обвини за постоење на, како што ги нарече „парацрковни структури” од Бигорскиот Манастир, за кои рече дека станале поголем проблем од проблемот со т.н. ПОА (на Јован Вранишковски), а го посочи и епископот Антаниски Партениј за директно неовластено мешање во неговите надлежности како претседател на Одделот за надворешни односи на МПЦ ОА:

Владиката Петар рече дека за ова прашање, пред да го изнесе јавно, имал слобода да го каже пред архиепископот Стефан, митрополитот Тимотеј, епископот Климент, синедрискиот митрополит Максим, претседателот на Комисијата за односи со верските заедници, свештени лица, преведувачи и др.

Митрополитот се осврна и на „случајот” на Украина , за кој рече дека проблемот таму не е црковен, не е ни политички, туку од геостратешка природа, и изрази силна увереност дека патријарсите Вартоломеј и Кирил се доволно мудри да најдат начин тоа што поскоро да го решат, како што впрочем досега и се решаваат сите воени судири – со седнување на иста маса:

The post Митрополит Петар – Ако се откажеме од дијаспората ќе исчезнеме (ВИДЕО) first appeared on Кепенци.

Кој бил во униформа во Белата Куќа?

Editor — Thu, 22 Dec 2022 16:28:33 +0000

Посетата на украинскиот претседател Володимир Зеленски кој тајно отпатува за САД, на средба со американскиот претседател Џо Бајден на големо се коментира на социјалните мрежи.

Посебно внимание привлекува невообичаениот дрес-код за официјален прием во Белата Куќа, во сиво-маслинеста воена униформа, која со месеци е вообичаен дел од имиџот на Зеленски пред јавноста.

Реткиот дрес-код се споредува со војничкиот комбинезон кој британскиот премиер Винстон Черчил го носел во Белата Куќа, во екот на Втората Светска Војна, на 3 јануари 1942 година, споредувајќи го, на тој начин значењето на конфликтот во Украина со значењето на претходната Светска Војна.

Но многумина негодуваат на споредбата на Зеленски со Черчил, нарекувајќи ја навредлива и потценувачка за големината на британскиот историски лидер со сегашниот украински претседател, за кој велат дека не му стига ни до колената.

Не го споредувајте неспоредливото, Черчил беше лидер кој остави печат во историјата, а Зеленски обичен актер кој се обидува да ја игра улогата која му е доделена.

The post Кој бил во униформа во Белата Куќа? first appeared on Кепенци.

Новиот ректор на УКЛО ја презеде функцијатa

Editor — Thu, 29 Sep 2022 22:21:54 +0000

Од 1 октомври битолскиот Универзитет „Св. Климент Охридски“ – Битола и официјално и формално има нов ректор, тоа е проф. д-р Игор Неделковски.

На чинот на официјално примо-предавање на ректорските инсигнии, одржан во четвртокот на 29.09 септември во Ректоратот на УКЛО ректорот во заминување, проф. д-р Сашо Коруновски му посака успешен мандат на Неделковски, за кого рече дека е сигурен дека уште повеќе ќе се грижи за напредокот на Универзитетот.

Новиот ректор на следната седница на Ректорската управа ќе предложи нови проректори, како дел од новиот „менаџерски тим” кој ќе управува со Универзитетот.

Прва јавна ректорска активност и обраќање, новиот ректор Неделковски ќе има пред студентите на Факултетот за безбедност, каде ќе присуствува на Првиот академски час на Факултетот кој годинава одбележува 45 години постоење.

The post Новиот ректор на УКЛО ја презеде функцијатa first appeared on Кепенци.

Фунтите и еврата повторно паѓаат во однос на доларот

Editor — Mon, 26 Sep 2022 11:16:29 +0000

Извештаите за анализа на финансиските информации покажуваат дека ноќеска еврото и фунтата паднале на историски најниското ниво во последните 20 години во однос на доларот.

Заедничката европска валута се тргуваше по 0,95 долари, ниво што не е регистрирано од 2002 година.

Британската фунта падна за речиси 5 отсто што е околу 1,0350 долари.

И покрај турбулентната ноќ во текот на утринските часови и двете валути полека но сигурно се закрепнуваат.

The post Фунтите и еврата повторно паѓаат во однос на доларот first appeared on Кепенци.

Хрватската полиција фати шверцери на дрога, меѓу нив и еден Македонец

Editor — Sun, 25 Sep 2022 18:42:03 +0000

Хрватската полиција уапси шест души кои биле здружени за шверц на дрога и хероин во Хрватска. Меѓу нив се наоѓал еден Македонец, Србин и четворица Хрвати.

Полицијата од осомничените заплени 3,9 килограми хероин.

Злосторничкото здружение како што го нарекоа хрватските медиуми набавувало хероин од една земјите од Југоисточна Европа, па го
прошверцувале на територијата Хрватска а го продавале на наркопазарот во Истарската, Загрепската и Сплитско-далматинската жупанија.

Од продажбата на 3,9 килограми хероин, осомничените заработиле најмалку 80.000 евра кои меѓусебно ги поделиле.

Тројца од осомничените се уапсени на подрачјето на Загреб, а по еден на подрачјето на Истра и на Сплитско-далматинската област.
Врз основа на пријавата од истарската полиција, донесено е решение за спроведување истрага против осомничените и да бидат приведени во истражен затвор.

The post Хрватската полиција фати шверцери на дрога, меѓу нив и еден Македонец first appeared on Кепенци.

Германија ќе се снабдува со гас од Обединетите Арапски Емирати

Editor — Sun, 25 Sep 2022 18:29:14 +0000

Обединетите Арапски Емирати (ОАЕ) и Германија потпишаа договор за снабдување на Германија со течен гас и дизел за период од 2022 до 2023.

Локалните медиуми јавија дека во септември имало директна испорака на бензин за Берлин и додаваат дека во 2023 година Германија ќе добива околу 250.000 тони бензин месечно.

Договорот го потпиша германскиот канцелар Олаф Шолц и Министерот за индустрија на ОАЕ Султан Ал Џабер.

The post Германија ќе се снабдува со гас од Обединетите Арапски Емирати first appeared on Кепенци.