франција - Кепенци

Ал открива непријавени базени во Францијa

Editor — Tue, 30 Aug 2022 09:19:37 +0000

Вештачката интелигенција создадена од Гугл и француската консултантска компанија Капгемини, која се персонифизцира со името „Ал”, во пробна пилот акција, за една година откри 20.000 непријавени домашни базени во Франција.

Базените прават околу 200 евра разлика, во пресметките на данокот на имот, кој со базен се третира како луксузно живеалиште со повисок данок.

Акцијата, во која вештачката интелигенција во првата пробна едногодишна фаза пронајде и лоцираше 20.000 непријавени базени, ќе обезбеди 10 милиони евра дополнителен приход во буџетот. По успешната пилот-проверка во Франција , се очекува вакви услуги од „Ал” да бидат побарани и спроведени и во други земји во светот. Во Франција до 2020 имало пријавено дури 3,2 милиони приватни базени – тренд кој во последната деценија е растечки во сите земји од развиениот свет.

The post Ал открива непријавени базени во Францијa first appeared on Кепенци.

Првомајски протести во Франција

Editor — Sun, 01 May 2022 16:03:28 +0000

Неколку полесно повредени, искршени прозорци и запалени контејнери е исходот од првите поголеми протести во Франција по реизборот на Емануел Макрон за втор претседателски мандат.
– Оди си Макрон !
– Пензија пред артритис!
му порачаа првомајските демонстранти на претседателот изразувајќи револт против неговата намера да ја зголеми старосната граница за добивање право на пензија.

Протестите во Париз и уште неколку градови низ Франција, посветени на меѓународниот Ден на трудот 1 Мај, поминаа главно мирно, освен еден инцидент кога полицијата морала да интервенира на обидот на демонстрантите да постават барикади од запалени контејнери на една од пристапните улици кон Плоштадот на револуцијата.

Протестите ги поддржаа речиси сите политичари од опозицијата, а некои од нив и се појавија меѓу демонстрантите, во обид да придобијат поддршка пред парламентарните избори во јуни, кои се оценуваат како голем тест за политиките на Макрон, независно од тоа што тој лично неодамна победи на претседателските избори.

The post Првомајски протести во Франција first appeared on Кепенци.

„Арогантниот“ наспроти „исплашената“

Editor — Thu, 21 Apr 2022 07:29:21 +0000

Ова е една од оценките на исходот на синоќешната завршна дебата пред гласањето во вториот круг претседателски избори во Франција кој треба да се одржи в недела.

Според анкетите, Макрон бил убедливо подобар во дебатата и успеал да го зголеми својот рејтинг на 59%, но и Ле Пен била далеку посамоуверена и со многу поиздржани аргументи, споредено со дебатата во 2017 кога дала впечаток на несигурност и незнаење.

Очекувано, нападите за нејзините наводно „проруски“ ставови, евроскептицизмот и неразбирањето на економијата беа главните адути за напад на Макрон, поради што аналитичарите велат дека тој на моменти изгледал претерано самоуверен и арогантен, наспроти што Ле Пен делувала исплашено и несигурно.

The post „Арогантниот“ наспроти „исплашената“ first appeared on Кепенци.

Анкети – Макрон го зголеми водството пред Ле Пен

Editor — Tue, 19 Apr 2022 21:27:36 +0000

Неколку дена пред гласањето во вториот круг на претседателските избори во Франција, во пет различни спроведени испитувања на јавното мислење, актуелниот претседател Емануел Макрон благо ја зголеми предноста пред неговата противничка, десничарката Марин Ле Пен.

Се смета дека предноста се должи на преумувањето на еден дел од гласачите на третoпласираниот во првиот круг, левичарот Меланшон, и покрај тоа што тој неодредено ги повика или да апстинираат или да поништат гласачко ливче.

На неговиот повик изречито да не се гласа за Марин Ле Пен многумина го сфатија како пренасочување на поддршката кон Макрон, бидејќи според аналитичарите апстиненцијата од гласање, сега најмногу ѝ одговара на второпласираната десничарка.

Самата Ле Пен зголемувањето на предноста на Макрон, го објаснува со неговата нагласена заплашувачка реторика, што според неа, е директна уцена на гласачите.

Макрон во кампањата меѓу двата круга ги нагласи врските на Ле Пен со Путин и Русија и нејзините анти-нато и анти-еу ставови, при што, според кампусот на Ле Пен, се создал страшен впечаток во јавноста дека на Франција со Ле Пен ѝ се заканува војна, нестабилност и изолација.

Според сите анкети, Макрон сега има поддршка меѓу 55% и 56% од гласачите што е за над 3% повеќе од првиот круг, односно за 1% зголемување за неколку дена.

И покрај тоа, дури и во таборот на Макрон има претпазлива воздржаност околу сигурноста на победата, бидејќи сите се свесни дека и малата разлика и приликите во Франција, па и во светот, се уште ги држат прогнозите за исходот во рамките на нестабилно променлива неизвесност до последниот момент.

The post Анкети – Макрон го зголеми водството пред Ле Пен first appeared on Кепенци.

Франција – мал одзив и многу неопределени

Editor — Sun, 10 Apr 2022 11:23:05 +0000

Денес Франција гласа на изборите за претседател. Речиси 50 милиони гласачи треба да се определат за еден од 12те кандидати, меѓу кои според анкетите најсериозни шанси имаат актуелниот претседател Емануел Макрон и десничарката Марин Ле Пен.

Првите оценки за изборите се дека одзивот на гласачите е многу помал од претходните години, што се толкува и како порака од гласачите до политичарите и политиката дека преовладува општа недоверба.

На последните анкети пред гласањето бројот на неопределените кои сѐ уште не решиле за кого ќе гласаат остана прилично висок 37%, но аналитичарите не мислат дека се можни некои поголеми изненадувања.

Она што се смета за пресудно за гласањето е економијата и животниот стандард, односно вечните теми – просечна плата и трошоци за живот.

Што се однесува до подемот на десничарските кандидати, вклучително и на Марин Ле Пен која според анкетите е најблиску до Макрон, се забележува интересен феномен дека тие добиваат поддршка и од гласачите со африканско или арапско потекло, кои велат дека гласањето за десницата е еден вид поддршка за Франција како нивна татковина.

Дел од слабиот одзив се објаснува и со преголемата ангажираност на Макрон во надворешната политика околу ЕУ, Украина и Русија, поради што не посветил доволно време и на својата кампања.

The post Франција – мал одзив и многу неопределени first appeared on Кепенци.

Франција му верува на Макрон

Editor — Fri, 04 Mar 2022 16:37:01 +0000

Според анкетите за претседателски избори во Франција Макрон ја има довербата од своите граѓани. Во меѓувреме тој ја објави својата кандидатура преку писмо до неколку регионални весници. Ако и на овие избори победи тој ќе биде првиот претседател кој во последните две децении успеал да го обнови мандатот.
Првиот круг од изборите е на 10 април.

The post Франција му верува на Макрон first appeared on Кепенци.