Лица без државјанство – „СТРАНЦИ ВО СОПСТВЕНАТА ДРЖАВА“ (видео сторија)

Editor — Fri, 30 Dec 2022 11:10:09 +0000

Станимир Пелифановиќ е еден од лицата без државјанство во Битола. Никогаш не ни помислувал дека на старост ќе мора да докажува дека од дете живеел само овде и никаде на друго место. Дури и бил во војска, а има и работен стаж, но денес има само привремен престој, како странец и никакви граѓански права кои следуваат со државјанството.

Вакви лица во Македонија има околу 500. Дел од нив – со години водат правна битка со институциите на државата. Во Битола моментално се работи на четири вакви случаи. Со решавањето на овие четири случаи ќе се реши статусот на нивните семејства.

И Аки Салиевиќ е во поодминати години, но се чувствува способен да работи за лекувањето на својата внука. За жал не смее – освен да собира шишиња на црно.

Во канцеларијата за бесплатна правна помош, во МКЦ во Битола, велат дека правото на работа на овие лица, е само едно од правата кои им се ускратени.

Во МВР Битола, велат дека прават се што е во нивна моќ да им излезат во пресрет, но дека сепак, лицата без државјанство мора со документи да го докажат нивниот долгогодишен престој во државата. Обезбедувањето документи за овие лица, кои во Битола се претежно Роми без постојана адреса на живеење, оди тешко.

Хуманоста и во овој случај значи заобиколување на законите. За среќа има лекари кои се чувствуваат обврзани со Хипократовата заклетва и се „снаоѓаат“ за никогаш да не вратат пациент, кој им побарал помош. Таков е примерот со општиот лекар Др. Стефан Раденков кој скоро секогаш им излегува во пресрет на ваквите лица колку што може.

Станимир и Аки се плашат дека нема да доживеат да го дочекаат државјанството. Тоа не е обичен страв од смртта туку и практичен проблем на нивните деца, затоа што според закон, овде не им следува ни погребнина.

Некои истражувања покажуваат дека на секои 10 минути во светот се раѓа дете кое ќе биде без државјанство. Додека не се реши овој проблем, бездржавјанството ќе води до исклученост на овие лица од општеството, живеење живот на маргините, во сиромаштија, и соочување со дискриминација.

Сторијата е снимена исклучиво со мобилен телефон исто како и аудио техничката обработка.

Видео сторијата е изработена во рамките на менторската програма за млади новинари на Младинскиот Образовен Форум во партнерство со УНХЦР, Агенцијата на ОН за бегалци, со поддршка од Миграцискиот повеќепартнерски доверителски фонд.

Сторијата ја подготви Владимир Котевски под менторство на Мери Јордановска

Голема благодарност до
Ирена Стојчевска – правник во МКЦ Битола
Др. Стефан Раденков – лекар по општа пракса
Ремзи Медик – Здружение Баирска Светлина

Посебна благодарност до
Станимир Пелифановиќ и Аки Салиевиќ
лицата без државјанство кои прифатија да ги изложат јавно своите проблеми и да бидат снимени за целта на проектот, но и надеж дека можеби некако ќе се поттурнe работата за решавање на нивниот статус.

The post Лица без државјанство – „СТРАНЦИ ВО СОПСТВЕНАТА ДРЖАВА“ (видео сторија) first appeared on Кепенци.

mof - Кепенци

Лица без државјанство – „СТРАНЦИ ВО СОПСТВЕНАТА ДРЖАВА“ (видео сторија)