битола - Кепенци

КИЦ Битола ќе соработува со училиштата во културни иницијативи

Editor — Wed, 25 Jan 2023 15:34:58 +0000

Културниот и информативен центар Битола поведе иницијатива за тесна соработка со основните и средните училишта во градот за осмислување заедничка културна програма и градење на идна публика.

На тркалезната маса: „Поврзаност на образованието, културата и уметноста“ – Воспоставување на соработка во културните дејности со основните и средните училишта во Општина Битола, директорката на ЈОУ КИЦ Битола, Лили Бошевска пред присутните директори на основните и средни училишта од Битола, ја презентираше иницијативата, која вклучува тесна соработка на полето на културата и образованието, поддршка на културни иницијативи, копродкција, учество во манифестации, како и програми кои ќе значат градење правилен однос кон уметностите и создавање идна публика и професионалци.

Иницијативата доби општа поддршка од присутните, после што се пристапи кон потпишување на меморандум за соработка. Во КИЦ Битола велат дека на овој начин сакаат да ја доближат културата кон младите, покажувајќи активен однос кон нивните поненцијали и потреби. Иницијативата е поддржана од Општина Битола во рамките на програмата за 2023 г.

The post КИЦ Битола ќе соработува со училиштата во културни иницијативи first appeared on Кепенци.

Богојавление во Св. Димитриј во Битола (ГАЛЕРИЈА)

Editor — Thu, 19 Jan 2023 14:27:43 +0000

The post Богојавление во Св. Димитриј во Битола (ГАЛЕРИЈА) first appeared on Кепенци.

Лука Дамчевски го фати чесниот Крст во Св Димитриј во Битола

Editor — Thu, 19 Jan 2023 10:23:15 +0000

На традиционалната церемонија на положување (фрлање) на Чесниот Животворен Крст, по повод големиот празник Богојавление Водици, во црковниот базен во дворот на соборниот храм на Светиот Великимаченик Димитриј во Битола, Крстот го фати и од осветените води го извади 15 годишниот Лука Дамчевски.

Топлото време поттикна голем број Битолчани да присуствуваат на денешната Света Божествена Богојавленска Литургија, да понесат осветена Богојавленска Вода во своите домови и да земат благослов со целивање на Чесниот Крст.

The post Лука Дамчевски го фати чесниот Крст во Св Димитриј во Битола first appeared on Кепенци.

Прекин со водоснабдувањето на потегот Музичко – Безистен и зградата Шекерзада

Editor — Wed, 11 Jan 2023 17:43:13 +0000

Во текот на утрешниот ден 12.01.2022 (четврток), поради промена на овални затворачи на ул.Булевар Први Мај со прекинато водоснабдување ќе бидат корисниците од:

Зграда Шехерезада,
Безистен и
објектите од Музичко училиште до Рудо Јагне

Прекинот ќе трае од 8.30 до завршување со активностите.

The post Прекин со водоснабдувањето на потегот Музичко – Безистен и зградата Шекерзада first appeared on Кепенци.

Божик во Офицерски во Битола (галерија)

Editor — Sun, 08 Jan 2023 20:17:30 +0000

Во преполнетата концертна сала на некогашниот Офицерски дом (денес КИЦ) во Битола, се одржа Божикен концерт на кој настапија:

Детскиот хор „Свети Стилијан“ од Битола

хорот „Свети Ахил Преспански“ од Ресен и

Машкиот хор „Свети Нектариј Битолски“

Хоровите беа поздравени со аплаузи од бројната одушевена публика, меѓу кои имаше и високи црковни и општински великодостојници, предводени од митрополитот г. Петар и битолскиот градоначалник Тони Коњановски.

The post Божик во Офицерски во Битола (галерија) first appeared on Кепенци.

Бадник во Битола – И сонцето ги поздрави сонцињата на Широк Сокак (ГАЛЕРИЈА)

Editor — Fri, 06 Jan 2023 14:51:47 +0000

По магливата ноќ, и неколкудневните густи магли надвиснати над Битола, на Бадник главната битолска пешачка улица Широк Сокак, осамна со детски џагор, и секако – мајки, баби, тетки, стрини и вујни … и по некој татко, кои се чини правеа повеќе метеж и врева од децата.

Ако Божик е Празник на мирот и радоста, тогаш нема ништо подобро од детската радост која благовести за Раѓањето. А на мирот? … Белки со тек на време сите постепено ќе се научиме.

Вечниот Бог слегува
и во утробата на Дева се вселува:
Свет, Свет, Свет си Пресвет Господи!

Царот на сите и Господ
дојде Тој што Адам го создаде:
Херувим, Херувим, радувај се, радувај
Пресвета Владичице!

Рождеството поучува и сe радува,
а чиновите ангелски се зачудени:
Терирем, терирем, радувај се, радувај
Пречиста Владичице!

Дојдете до пештерата да се приближиме,
во јасли како лежи Господ да го видиме:
Свет, Свет, Свет си Пресвет Господи!

Од Исток мудреци доаѓаат
и дарови носат достојни:
Херувим, Херувим, радувај се, радувај
Пресвета Владичице!

Кога слушна Ирод за настанот,
целиот се потресе озлобениот:
Терирем, терирем, радувај се, радувај
Пречиста Владичице!

Небесата слават и се радуваат,
ангелите Го воспеваат:
Свет, Свет, Свет си Пресвет Господи!

Се радуваат созданијата,
и празнува природата:
Херувим, Херувим, радувај се, радувај
Пресвета Владичице!

Да го воспееме Господ, Христос наш,
во пештера родениот:
Терирем, терирем, радувај се, радувај
Пречиста Владичице!

Дево, Мајко и Владичице,
спаси ги оние што кон тебе прибегнуваат
Свет, Свет, Свет си Пресвет Господи!

Вечниот Бог слегува
и во утробата на Дева се вселува:
Свет, Свет, Свет си Пресвет Господи!

Бадниковите Поворки се релативно нова традиција, која со организациска помош на училиштата, поедини наставници и хуманитарни организации, се обидува од година во година сѐ повеќе да заживее кај младите генерации.

Во продолжение – интегралната галерија од настанот. Децата беа во придружба на возрасни и родители кои не само што го одобруваа туку го поттикнуваа фотографирањето. Детската радост не е возможно да се цензурира, скрие или замати.

Христос се раѓа славете!
Христос се раѓа радувајте се!
За многу години мирот и радоста на светот!

The post Бадник во Битола – И сонцето ги поздрави сонцињата на Широк Сокак (ГАЛЕРИЈА) first appeared on Кепенци.

Татјана Грегова: Среќните и насмеани лица на децата се најдобрата потврда за успех на воспитувачот

Editor — Sat, 17 Dec 2022 12:24:00 +0000

Во време кога често се вели дека воспитанието како компонента од воспитно образовниот процес е запоставено, да се има „специјалист“ за воспитание на деца блиску, во својата заедница е вистински благослов. Добитникот на признанието на Сојузот на просветните работници, Татјана Грегова од Битола е еден таков светол пример.

Во времето во кое живееме, образованието често се споменува како причина за проблемите. Но истовремено и поле каде се наоѓа решението за многу општествени предизвици. Воспитниот момент како компонента е важен дел од образовниот процес и градењето на една млада личност воопшто. Оттука, професијата воспитувач, станува се’ повеќе важна, би рекле – клучна во процесот на развој и позитивни реформи на едно општество, но за жал, кај нас е често на маргините, недоволно вреднувана, па дури и потценувана.

Тоа е причина повеќе да се истакне, посочи и вреднува секој поединeчен светол пример на воспитувач. Татјана Грегова – воспитувач во ЈОУДГ „Мајски Цвет“ во Битола е пример кој заслужува внимание, дотолку повеќе што нејзината посветеност и одговорен пристап кон оваа важна професија беше препознаен од општеството и неодамна таа доби високо професионално признание од Сојузот на просветните работници. Татјана Грегова е дипломиран учител и дипломиран воспитувач и како што таа умее на шега да каже – „специјалист“ за воспитание и образование на деца до 10 годишна возраст. Татјана е мастер воспитувач за колегијална поддршка и воспитувач со звање ментор.
Повеќе за неа во ова издание на рубриката Анфас (интервју).

Што значи за Вас професијата воспитувач за предучилишно образование?

– Воспитувач во градинка е лицето кое се грижи за безбедноста, воспитанието и севкупниот развој на децата од 2-6 години за време на престојот во градинка.

Воспитувач е една благородна професија која може да се стави на листата како една од најодговорните и најстресните професии во современово време.Професија која бара многу Љубов, одговорност, имагинација, креативност, издржливост,трпение, флексибилност, почит, комуникациски вештини и способности бидејќи покрај работа со децата се работи и со родителите и поблиските членови на семејството на детето.

Затоа една препорака до сите кои планираат да студираат за воспитувач и работат со деца од предучилишна возраст пред да ја донесат одлуката за избор на професија добро да ги запознаат сите карактеристи предности и недостатоци на ова професија, бидејќи наивно е да се верува во тоа дека за да се биде добар воспитувач треба само да се сакаат децата. Професијата е постојано изложена на психо-емоционален стрес и бара способност за контрола на своите емоции и однесување.

Што значи за вас лично признанието од Сојузот на просветни работници?

– Признанието кое го добив испраќа една порака дека трудот може да се цени и вреднува во Македонија.

Чест и задоволство е да се добие признание за трудот, работата, посветено време во професијата во работата со децата од предучилишна возраст. Тоа сега ми дава дополнител поттик и мотивација за достигнување на повисоки цели во својот професионален и кариерен развој.

Кој е клучниот момент кога сфатите дека сте добра во ова што го работите?

Клучен момент дека ќе сум добра во тоа што го работам немаше. Тоа беа повеќе моменти пред се среќните и насмеани лица на децата кога доаѓаа во градинка. После месец дена работа во група со деца знаев дека „тоа е тоа“ жаргонски кажано, што сакам да го работам. 12 години го чекав повикот да го работам со деца и оваа работа е работата која ја сакам и ми причинува задоволство а постои голема разлика меѓу работа и повик и тоа треба да ни биде јасно.

19 години бев активен член и волонтер во Црвениот крст. Како сертифициран младински лидер и тренер постојано следев обуки и го збогатував своето знаење не само од области поврзани со Црвениот крст. Стекнатото знаење и искуство постојано го досеминирав на обуки и работилници не само со младите членови, учениците, студентите туку и на различни категории на лица од различна возраст и професија.

Искуството од обуките и работилниците многу ми помогна кога започнав да ја работам професијата учителка во одделенска настава а покасно и воспитувач во градинка да застанам пред децата без трема, страв несигурност. Пред себе ја имав својата самодоверба, стекнатото академско знаење и компетеции кои стекнав за време на студирањето на Педагошкиот факултет на насоките за предучилишно воспитание и одделенска настава.

Во градинките има и деца со пречки во развојот, секоја од овие попречености е специфична и налага посебен пристап. Како се справувате со тоа?

– За жал во последните години се повеќе децата во градинките имаат развојни потешкотии. Ние воспитувачите постојано се едуцираме и обучуваме да им излеземе во пресрет на овие деца меѓутоа сметам дека овие деца заслужуваат индивидуална поддршка од стручни лица (специјални едукатори и рехабилитатори) бидејќи потребата на овие деца за поддршка е различна и уникатна, од дете до дете.

Имате ли некоја посебна анегдота поврзана со работата со деца и комуникацијата со родителите која би сакале да ја споделите?

– Секојдневно во градинарскиот престој и работа со децата се случуваат анегдотски ситуации кои за жал заради природата на работа во тој момент не сум во можност да ги запишувам, инаку би произлегла книга многу интересни и позитивни, вистинити анегдотски приказни, а баш сега немам некоја која посебно би ја издвоила .

Едно е многу важно при работењето на оваа професија, а тоа нашето однесување. Ние воспитувачите сме модел за секое дете и затоа треба да внимаваме како се однесуваме и кои примери на поучување ги презентираме пред децата, затоа што тие многу добро умееат да имитираат.

Која е Татјана надвор од градинката?

– Бивши професионален спортист, кој тренирал и играл 10 години активно кошарка. Со спортскиот дух се уште се дружам 13 години редовно вежбам пилатес, понекогаш и држам часови заменувајќи го тренерот по потреба.

Татјана е дел од редакцискиот одбор на издавачката куќа „Едука Мак“ Скопје која е специјализирана за литература за деца од предучилишна и рана училишна возраст.

Коавтор на Македонска Илустрирана Енциклопедија за деца како и два прирачници по математика „ Математички текнувалки“ за деца од предучилишна возраст и редовен соработник во детското списание „ Супер Смешка“

Соработник во детскиот музички фестивал „Тра ла ла“. Што се однесува до музиката љубителка на евергрин музика , но за музичките вкусови не се зборува секоја музика е добра и посебно убава.

Татјана е љубител на фотографирање. Секојдневно на социјалните медиуми поставува убави фотографии и конкурира на конкурси за фотографија. Инспирацијата е секојдневието. Предизвик – секој миг, момент, пејсаж, растение, дете.

Како би се опишале себе си како личност?

– Модерново време донесе во нашиот говор да употребуваме зборови од немакедонско говорно подрачје така да за ова прашање ќе употребам еден збор Татјана е„ мулти-таскинг“ личност или во превод, лице кое секојдневно прави по неколку работи нееднаш. Како со тоа се справувам јас велам благодарение на умешноста за организација, а дали е тоа така, најдобро знаат оние кои подобро ме познаваат .

Кога некој ќе побара од мене да се опишам најчесто ги користам придавките со буквата со која започнува моето име три Т: – темпераментна, – тактична, – толерантна – башка табиет по битолски кажано.

Типична, горда битолчанка која сака да шета, патува, да се дружи, да пие кафе на Широк Сокак, никогаш не неуморна за шопинг, концерти, театар – јавни настани и манифестации. Ја обожувам Битола и убавината на нашиот Пелистер.

Кое е вашето животно мото?

– Никогаш не им го прави на луѓето она што не сакаш тебе да ти го прават.

The post Татјана Грегова: Среќните и насмеани лица на децата се најдобрата потврда за успех на воспитувачот first appeared on Кепенци.

Битола нема аеродром, ама нема ни хиподром

Editor — Wed, 02 Nov 2022 14:11:17 +0000

Битолчани денес со гордост се сеќаваат на епитетите на Битола како град на конзулите или на клавирите, па дури и на “дембелите” или кафепијачите на тефериџ, како носталгија кон традициите со која се спротиставуваат на современите процеси на обезградување на градот и постепеното претворање на некогашниот голем и важен економски, културен, дипломатски центар во провинција, како што велат во Скопје „од внатрешноста“.

Деновиве со снимањето на дел од сцените за турската серија во продукција на каналот на Дизни, посветена на Мустафа Ќемал Ататурк, Битолчани се потсетија и на времето на пајтоните и чезите, кога коњскиот тропот не беше непознат или редок звук за битолските сокаци и калдрми.

Но животот неминовно оди напред, а техничко технолошкиот развој разбирливо ја замени практичната употреба на коњите со автомобили, кои исто како и камерата, филмот и киното, многу рано ги имаше во некогаш „најградскиот град во Македонија“, за во времето на СФРЈ во 70-те и 80-те, Битола да стане втор град во Југославија, после Марибор, според бројот на автомобили по глава на жител.

Но тоа секако не требаше да значи дека во име на напредокот, треба да се напушти некогашната битолска урбана речиси „аристократска“ благородност, која секако, се поврзува со животните за кои велат дека се најблагородни и најдостоинствени – коњите.

Денешните битолски деца ретко можат да видат коњ во живо, освен во случаите на испуштени коњи кои понекогаш пасат меѓу зградите на периферните населби или се шетаат низ улиците, или коњите во запрега на Ромите кои собираат пластика по контејнерите, што од јавноста се смета за нешто лошо, и честопати се користи како аргумент на критичарите за т.н. “поселанчување“ или деурбанизација на градот.

Ако на ова се додаде дека најголемиот урбан центар во препанско-пелагонискиот регион кој се смета за подрачје со ресурси за најголем земјоделски потенцијал, тогаш е нејасен парадоксот, со кој често странците се многу изненадени – како може во средното Земјоделско училиште да има толку малку ученици, а и интересот за студирање на Земјоделскиот факултет не е баш за пофалба.

Токму затоа настанот, кој воочи празникот на Битола, 4 Ноември го организираат во Земјоделското училиште „Кузман Шапкарев“ во соработка со Здружението „Галоп“ Битолска коњаница има редок потенцијал, да лоцира, препознае и промовира една многу важна област за иднината на Битола и за целиот регион.

Низ игра и забава, со пристап близок до учениците, со денска Ди-Џеј журка, многу коњи меѓу кои и коњот Торнадо како атракција, зачинето со коктелите на Теодор Ралевски, но и со голема сериозност во протоколарниот дел во кој ќе земат учество и претставнци од Институтот за земјоделство и сточарство и ќе бидат потпишани Меморандуми за соработка, како прв чекор за покажување добра волја на еден заеднички пат кој може да доведе до многу поорганизиран развој на коњичкиот спорт во Битола, и поголема присутност на коњите за рекреација, едукација, туристичка атракција … итн.

Впрочем, и за да се вратат пајтоните низ битолските улици се потребни коњи, можност за организирано чување, одржување и тренирање во ергела, пристап до школи за рекреативно јавање, а зошто да не и Битолски Хиподром – како коњички центар во кој би се обновил, продолжил и развивал потенцијалот на некогашната битолска традиција.

The post Битола нема аеродром, ама нема ни хиподром first appeared on Кепенци.

Сојузот на Борците од НОАВМ од Битола со концерт по повод 11 Октомври во Битола

Editor — Sat, 08 Oct 2022 12:09:57 +0000

Недела во 12:30 часот во Градскиот парк во Битола „Сојуз на Борците од НОАВМ 1941 – 1945 и граѓаните продолжувачи“ организираат концерт во чест на 11 Октовмри, Ден на народното собрание на македонскиот народ.

Ќе настапат Камерниот оркестар од Битола и младинскиот хор, КУД “Стив Наумов”.

Исто така утре ќе бидат доделени наградите од конкурсот за основните училишта за најдобра проза или поезија на тема
„ПЛАМЕНОТ НАШ ОКТОМВРИСКИ ВЕЧНО ГОРИ“,
тема посветена на Народноослободителната борба на Македонија, конкурс што го организирал Сојузот на Борците од НОАВМ од Битола.

The post Сојузот на Борците од НОАВМ од Битола со концерт по повод 11 Октомври во Битола first appeared on Кепенци.

Приведени: дилер од Битола, разбојници од Скопје и управител на пошта што уништил архивски материјал

Editor — Wed, 05 Oct 2022 11:59:02 +0000

На 04.10.2022 во Битола, полициски службеници од криминалистичката полиција при СВР Битола го привеле дваесет и шест годишниот Д.Ч. од Битола.

При претрес во неговиот дом, извршен со судска наредба, биле пронајдени и одземени кокаин, марихуана и други предмети со остатоци од непозната материја.

Тој бил приведен во полициска станица и по целосно расчистување и документирање на случајот против него ќе биде поднесена соодветна пријава.

Истиот ден во Скопје на бул.„Никола Карев“ во Скопје од полициски службеници од СВР Скопје ги привеле Н.Љ.(27) и М.Љ.(29), двајцата од Скопје, постапувајќи по пријава според која непосредно пред тоа, на подрачјето на Кисела Вода, сториле кривично дело „разбојништво“, при што од едно лице одзеле мобилен телефон.

По преземени мерки и активности сопрено е патничко возило „фиат пунто“ со скопски регистарски ознаки, во кое се превезувале двете осомничени лица, тие се приведени во полициска станица, а кај нив е пронајден одземениот предмет.

По целосно документирање на случајот против нив ќе биде поднесен соодветен поднесок.

СВР Скопје – Единица за економски и компјутерски криминал поднесе кривична пријава против К.Л.(59) од Скопје, поради постоење основи на сомнение за сторено кривично дело ,,уништување или прикривање на необработен архивски материјал”.

Пријавениот, управник на експозитура во АД „Пошта на Северна Македонија”, во текот на 2021 година самоволно придонел за уништување на документиран службен материјал за 2018 година без да има дозвола и одобрение добиени од Државниот архив на Република Северна Македонија за уништување на предметниот службен материјал.

Извор: МВР

The post Приведени: дилер од Битола, разбојници од Скопје и управител на пошта што уништил архивски материјал first appeared on Кепенци.