длабоко - Кепенци

Акатист на преподобниот отец наш Наум Охридски чудотворец

Editor — Sun, 02 Jul 2023 23:00:22 +0000

Акатистот е творештво на сестринството на Слепченскиот Манастир Св. Јован Претеча

Кондак 1

Радоста твоја Науме свети, заблеска вис небеса, кога Вишниот по твоите молитви погледна на родот човечки, затоа со едно срце и една уста повикуваме:

Радувај се, оче преподобен Науме по чии молитви, небесната благодат срце и души ни лекува!

Икос 1

Вишно небо утеха подарува кога милоста Божја во тебе за човека се застапува, непријателот од тоа во тага потонува, а ние ти воскликнуваме:

Радувај се, смирен патниче под сводот небесен!
Радувај се, подвижниче по чии молитви природата се скротуваше!
Радувај се, од Совршениот поучувајќи се, мирот Негов на учениците го подаваше!
Радувај се, благодатен човеку, од чие присуство демоните треперат!
Радувај се, болните пред тебе припаѓајќи Христа Бога Го прославуваат!
Радувај се, преку тебе славословието на слабите на небесата се послушува!
Радувај се, ги оплемени со словото оние кои за слобода мечтаеја и на Бога се надеваа!

Радувај се, оче преподобен Науме по чии молитви, небесната благодат срце и души ни лекува!

Кондак 2

Науме преподобен, горски цвету во пустината, преку тебе вера и надеж во срца ни се раѓа, со љубов Еден во Троица, Пат, Вистина и Живот ни постанува, нам кои незапирливо повикуваме: Алилуја!

Икос 2

О, велики Науме, плоду достојнославен на благочестивите твои родители, украсу на земјата, кој раце кон небото за секого подигнува, слушни сега од срца отворени и очи солзливи:

Радувај се, воину Христов, кој во срце и душа дете остана!
Радувај се, Словото Божјо од младоста ум ти заљубува!
Радувај се, ангелски пој самарјанска песна ти запеа!
Радувај се, Архангелска ревност вистина и храброст во тебе подигна!
Радувај се, ти над кого небото детска глава со благодат оросуваше!
Радувај се, ти под чии нозе земјата со милост се додворуваше!

Радувај се, оче преподобен Науме по чии молитви, небесната благодат срце и души ни лекува!

Кондак 3

Фиданка плодоносна постана со послушание залеана, од Христова благодат зацврстена, надеж Кирилометодиева, која сега род породува за оние кои Му воскликнуваат на Бога: Алилуја!

Икос 3

Патека се отвори кон Храм за душа подготвен кој во црноризец те роди, Христови стапалки да следиш имајќи во Кирил и Методиј, светите, смирени мудри учители. Благодарејќи за тоа Господа Го фалиме и тебе ти пееме:

Радувај се Науме, чие срце во поход кон вистината го поведе!
Радувај се, бура светска смири во монашка тишина!
Радувај се, очи кон небесата од келија храбро подигна!
Радувај се, науката над науките, храна насушна ти постана!
Радувај се, обручник стана на вистината која ослободува!
Радувај се, сопатнику на оние кои од водата на Животот пиеја!
Радувај се, Кирил со мудрост те хранеше, а Методиј со смирение те покриваше!

Радувај се, оче преподобен Науме по чии молитви, небесната благодат срце и души ни лекува!

Кондак 4

Промислата Божја во тебе плодна почва пронајде, кон спасение те поведе и свето – Јованова патека ти отвори: народ поучувајќи, кон покајание поведувајќи, слово за славословие на евангелско познание подари, о, Науме свети, поради кого кон Бога повикуваме: Алилуја!

Икос 4

Ефата повика, Оној Кој очи на слепороден отвори, подателе со слово кое лето Господово објавува – уста твоја проглаголи, за народ кој за вистина жеднееше тебе да ти благодари:

Радувај се, преку тебе Вишниот вода жива до родот човечки испрати!
Радувај се, Ростислав мудар како еден од своите учители, во срцето на својот народ те приви!
Радувај се, Кирилово перо непотрошливо!
Радувај се, Методиева службо незапирлива!
Радувај се, Моравската планина, заради тебе и твоите, плодоносна долина постана!
Радувај се, штит на верата и копје на вистината против ересите постана!
Радувај се, оние кои во смртна сенка седеа за рамноапостолен те признаа!

Радувај се, оче преподобен Науме по чии молитви, небесната благодат срце и души ни лекува!

Кондак 5

Ангелските чинови не заборавија на избраните од родот човечки, кои крстот свој носејќи го поитаа да сеат семе Христово: Кирил и Методиј, Климент и Наум, Сава, Горазд и Ангелариј. Заедно денес со нив и Небесата пее: Алилуја!

Икос 5

Не ја забораваме, о Науме, светата дружина твоја, и затоа кон тебе воскликнуваме:

Радувај се, ученику, кој словото Кирилометодиево го распространуваше!
Радувај се, ти кој за чистотата на верата се бореше!
Радувај се, неуморен патнику по нивата Божја неорана!
Радувај се, свето – Климентов сотрудниче!
Радувај се, собрат на Горазд епископот Моравски!
Радувајте се, со Сава и Ангелариј неуморни молитвеници!
Радувајте се, од земја во земја, како од небо до небо, благодат зголемувавте!

Радувај се, оче преподобен Науме по чии молитви, небесната благодат срце и души ни лекува!

Кондак 6

Слава и благодарност кон Тебе вознесуваме, о, Боже на силите, неуморни коленопреклонувања пред икона Твоја принесуваме, и за сѐ што за нас правиш преку избраниот од светиите Наум, повикуваме катадневно: Алилуја!

Икос 6

Ревноста твоја по Христа умносрдие ти подари, ум се отвори за писание кое многумина ќе разбуди, кои со глас радосен глаголаат:

Радувај се, учителе кој за многумина родител постана!
Радувај се, пастиру кој во Христа мноштво души приведе!
Радувај се, беседниче, кој мудроста од овој свет ја посрами!
Радувај се, војниче кој троглавата змија под нозете со вистината Христова ја понижи!
Радувај се, утеха стана за напатените!
Радувај се, прибежиште си за отфрлените!
Радувај се, небесен гласнику на волјата Господова!

Радувај се, оче преподобен Науме по чии молитви, небесната благодат срце и души ни лекува!

Кондак 7

Патишта далечни и крстосници немили, нозе твои поминаа, крстот свој носејќи го Божја волја исполнуваше, и затоа сега нам благодат спасителна Христова ни испраќаш, за да ние воскликнуваме кон Бога: Алилуја!

Икос 7

Архипастирот Адријан ја препозна волјата Господова словото народ да не поробува, туку спасение да подава во писмо кое ум ќе избиструва и усти отвора од кои се слуша непрестајно:

Слава Ти Господи Кој Наум свети при нас го испрати!
Слава Ти Предвечен Кој по неговите молитви нас нѐ запази!
Слава Ти Господи, Кој коленопреклонувањето негово за нас, не го отфрли!
Слава Ти Господи жедното глаголање наше кон Тебе, во писмо го преточи!
Слава Ти Господи, кој за навек за пастир наш Наума го постави!
Слава Ти Господи, Адријан твојот слуга Наума во виш чин пред престолот на светите таинства го подигна!
Слава Ти Господи, поради Кој и ние денес кон нашиот небесен застапник Наум повикуваме:

Радувај се, оче преподобен Науме по чии молитви, небесната благодат срце и души ни лекува!

Кондак 8

Кирило свети премина во населбите на вечноста, Методиј ја приведе дружината кон крајот на нивата неорана, за и самиот од Господа да биде повикан во небесната татковина. Затоа душопогубниот искушувач наезда подигна кон Климентовата света дружина која на Бога пееше: Алилуја!

Икос 8

Поитаа браќата нов грст пченица да зафатат, по течение на река Дунавска, ново семе со глаголична азбука да посеат при народи кои за Љубов Христова жеднеат, и кон светиите повикуваат:

Радувај се, Клименте, кој слово Кирилово од уста не испушти!
Радувај се Науме, кој учител во животот на верните во Христа постана!
Радувај се, Горазде кој на нива Методиева, семе Христово поттикнуваше да изрти!
Радувајте се, Саво и Ангеларие чиј ревносен оган молитвен пред Бога не се намали!
Радувај се, о, Науме, на кого Вишниот такви собраќа му подари!

Радувај се, оче преподобен Науме по чии молитви, небесната благодат срце и души ни лекува!

Кондак 9

Земјата која кон Павле апостолот повика, земјата која Христа катадневно сака да Го восфалува, земјата која стана Кирилометодиева лулка на слово во слава на светоста, земјата сега Климентонаумова, земјата, кон Бога повикува: Алилуја!

Икос 9

Со собратот Климент кој епископски жезол пред волкот духовен исправи, Девол и Кутмичевица прогон за вас не станаа, туку полетна нива плодна во која семе на наука Христова се посеа и стотици воини на словото се подигнаа, за и ние со нив денес Науме, кон тебе да повикуваме:

Радувај се, Климент архипастир, а ти смирена ѕвезда пред сечија душа се покажа!
Радувај се, Охридско езеро твоја наметка во своја длабочина сочува!
Радувај се, Галичица, умилна гора маслинова ја покажа!
Радувај се, лавот од пустината Јорданска во питома мечка се изнедри!
Радувај се, учителе, чии чекори уште одекнуваат по тесните градски улици!
Радувај се, книги вдахновени и писма утешни за народ Духот Свети преку тебе состави!

Радувај се, оче преподобен Науме по чии молитви, небесната благодат срце и души ни лекува!

Кондак 10

Утеха си на верните, Науме преподобен, кои сакаат од мрежата на овој свет да се извлечат, Господа да Го прославуваат, повикувајќи: Алилуја!

Икос 10

Храмот на ангелите послужи како небесна кочија во која се собираат молитви за души покајнички кои возведени чекаат на Божји милости. Затоа верните благодарно кон тебе повикуваат:

Радувај се Науме, чиј живот ангелски заблеска!
Радувај се, Михаил свети поради тебе за нас војува!
Радувај се, Гаврил свети, ни благовести утешение!
Радувај се, Салафаил свети, поита на молитва и благодарење да те научи!
Радувај се, Уриел свети, Светлината Христова во тебе ја запали!
Радувај се, Рафаил свети, благодат Божја за исцеление ти подари!
Радувај се, Варахил благословот Божји во твоите раце го прилепи!
Радувај се, Јегудил преку уста твоја народ научи Бога да Го славослови!
Радувај се, свита небесна Вонмен за преумување возгласува!

Радувај се, оче преподобен Науме по чии молитви, небесната благодат срце и души ни лекува!

Кондак 11

Боите на виножитото извираат од твоето езеро, а звукот на утехата сили духовни обновува на секој кој тебе те повикува пеејќи: Алилуја!

Икос 11

Иако дрската смеа од овој свет, околу твојата наметка, ора разигрува, сепак верните огнен столб ги придвижува, колена во твојата обител да приклонат и во тивкоста на срцето да повикуваат:

Радувај се, мирот Христов за нас го сочува!
Радувај се, од Господа измоли до крајот на вековите да останеш со паствата!
Радувај се, земната почивка твоја нова Гетсиманија за молитва се покажа!
Радувај се, молитвен столбу од кого непријателите се принудени да отстапат!
Радувај се, векови минаа, а ти, Науме свети, вечно деца пречекуваш!
Радувај се, утехо на верните, лекару на немоќните, поттик на монасите!

Радувај се, оче преподобен Науме по чии молитви, небесната благодат срце и души ни лекува!

Кондак 12

Голем си ти пред Господа, Науме свети угодниче, почитуван во градината небесна, прославуван од верните кои при тебе најдоа тивко пристаниште, од каде кон Господа повикуваат: Алилуја!

Икос 12

Немост имаме на усните, бидејќи сиромашни се зборовите кои сакаат дела Божји преку тебе да прикажат, но сепак глаголаме:

Радувај се, ти кој имаш срце детско, радосно!
Радувај се, душа за Христа обручена и мажествена нарав пред угнетувачите од овој свет покажа!
Радувај се, сотрудник и сопатник на оние кои евангелски глас во писмо за народ простираа!
Радувај се, ревноста твоја неправдата на високоумието кај придојдените во светот ја потопи!
Радувај се, хушкачот поднебесен трепереше од Христовата благодат во тебе удомена!
Радувај се, исцеленија и утешенија Господ преку тебе непрестајно дарува!
Радувај се, тивко пристаниште во кое Божјата барка е укотвена!

Радувај се, оче преподобен Науме по чии молитви, небесната благодат срце и души ни лекува!

Кондак 13

О, Науме, непрестаен пред Господа застапниче, столбу непоколеблив на вистината, висока горо на надежта која подножјето небесно го допира, Љубов Божја исткаена при кивотот на твоето земно присуство, незапирливо нека твојата рака нѐ благословува и пред Бога Троичниот гревовите наши ги покрива, за постојано да повикуваме кон Него: Алилуја!

Молитва кон светиот Наум Охридски чудотворец

Покровителе Небесен, сило Божја која во тело човечко се појавува, преку молитва која човека го озарува, Науме свети, оче преподобен, припаѓајќи и денес пред твоите нозе неуморни, кои евангелската вистина ја сееја, целивајќи ја твојата охристовена десница, молба недостојна кон тебе испраќаме, а често и коленопреклонување од тело слабо принесуваме, за ти светињо Господова да нé имаш во закрила пред Него и за нас да измолиш мир за душата отсега и довека, за прегрешенијата покривка тивка, која список на долгови развејува, постојан пазител во сите денови од животот земен наш. Така од тебе запазени, при Христови нозе, глава да одмориме, вера да запазиме, и со небесните хорови пееме:

Свет, Свет Свет Господ Саваот!

Молитва за угнетените од непријателите

Оче преподобен Науме, учителу на верата, во кого Христос благодат излеа и молитва твоја не отфрла. Застапи се оче свети пред Господа, за чедото твое (име) кое еве пред Бога Троичниот сега преку тебе побрза. Нека Оној Кој тебе те милува погледне и го исцели слугата Негов (име) од влијанието на дрскиот непријател на душата негова. По твоите молитви Науме свети нека се изгонат од него сите полкови демонски кои заради неговите падови навалиле на него и душа негова притискаат. Побрзај Божји угодниче за да се спаси овој слуга недостоен (име) од секое мечтаење предизвикано од лукавиот и така доаѓајќи при себе, да му благодари на твоето застапништво и Бога Го прослави Кој ете и сега по твоите свети молитви не го погубува созданието на рацете Негови. Амин.

Величание

Те величаме учителу на верата која спасува, Науме свети чудотворче, надалеку за твоите чудеса проповедаме и така Христа Бога Го прославуваме Кој тебе сад благодатен непотрошлив пред вселената те покажа.

The post Акатист на преподобниот отец наш Наум Охридски чудотворец first appeared on Кепенци.

Една метанија една солза – Длабок поклон на покајание

Editor — Fri, 03 Mar 2023 21:06:13 +0000

Пишува Димитра Десановска

Верниците од Православна вероисповед започнаа да се подготвуваат за најсветлиот, најголемиот, и најрадосниот празник Христово Воскресение – Велигден. Празник на кој се радува и млад и стар, и машко и женско, и богат и сиромашен.

Имено, Православните верници започнаа со постење на Великот Велигденски пост кој трае седум недели.

Светата Црква како грижлива мајка, своите чеда ги подготвува уште три седмици пред да започне Великиот пост.

Но, што е постот?

Постот претствува одрекување од мрсна храна т.е. храна од животинско потекло, како и од млечни производи, па дури и од масло. (земајќи го предвид типикот или правилото за постење во текот на постот). Но, поважен и далеку покорисен е духовниот пост кој му е помил на Бога. Тоа значи одрекување од страстите, од похотта, од лошите навики, од прејадувањето, од правењето зло, од лошите мисли и помисли, од лошите дела, покајание и исповед за направените гревови и грешки.

Како да се постигне сево ова?

Да се биде подобар човек и подобар Христијанин, па и за да се постигне се горенаведено, не е така лесно и едноставно.

За тоа е потребно редовно одење в Црква и земање учество во службите и Литургиите, како и молитва, и правење добри дела.

Верниците кои ги посетуваат службите то текот на Велигденскиот пост, сигурно забележале дека во Божјите храмови- Црквите и во Манастирите, монасите, свештениците и верниците прават длабоки поклони или метании.

Веројатно тоа предизвикало некаква збунетост кај верниците. Но, има обајснување и за тоа.

Што претставуваат метаниите?

Бог е Бог на живите и се грижи за луѓето.

Се што се случува во Црквата има своја смисла и своја симболика.

Слушајќи ги службите, верникот треба да се кае пред Бога.

Тоа покајание треба да произлегува од душата на верникот.

А потврда за тоа е самата метанија односно самиот поклон.

Метанијата е физичко поклонување пред Бога кое соодветствува со духовното.

Тоа треба да се извршува во смиреност и трпеливост.

Метанијата е одраз и почит кон Бога, кон Мајката Божја, кон Светителите, кон Небесните бестелесни сили.

Тие се доказ за тоа дека човекот греши, но ако искрено се покае Бог ќе го помилува.

Но, и дека покајанието носи до чистина на душата и поклон кон Севишниот Бог.

Човекот секогаш греши, па секогаш треба и да прави метании или длабоки поклони.

Метаниите (длабоките т.е долгите) не се прават единствено во сабота и недела, по првата недела пред Велигден и Духовден т.е. Педесетница, како и од Божик до Богојавление (Водици) и на сите Богородични и Господови празници.

Тогаш се прават кратки или мали метании (до половината).

Лесни и Богоугодни пости!

The post Една метанија една солза – Длабок поклон на покајание first appeared on Кепенци.

Сириските Светители Ефрем и Исаак

Editor — Fri, 10 Feb 2023 16:47:38 +0000

Во овој ден (10.2.2023) го чествуваме споменот на големите Православни заштитници Светиот Ефрем и Светиот Исак Сирин. Овие два големи светилници со нивниот свет живот покажале дека плод на верата се добрите дела, трпението и смирението. Нивната љубов и преданост, нивниот постојан копнеж по Христос треба да бидат пример за сите нас.

Светата Православна Црква, како грижлива мајка за своите чеда, овие Светители ги упатува како примери на кои треба да се огледа секој Христијанин, во овој период пред Велигденскиот пост.

Светиот Ефрем Сирин бил роден во Сирија. Тој бил дете на сиромашни родители, во времето на Светиот Константин Велики. Овој голем Светител бил ученик на Светиот Јаков Нисибиски, кој бил втор епископ на Нисибија. Светиот Ефрем бил посветен на молитвата, но и на пишувањето книги. Ги поучувал и монасите. Бил голем подвижник. Се населил во Царството на својот Господ, во 373 година.

За неговиот живот врзан е и еден многу интересен настан, кој води и до животот на Светиот Василиј Велики. Имено, кога Светиот Ефрем бил повикан за епископ, тој не сакал да ја прифати таа покана, затоа што се сметал за недостоен. Поради тоа, станал јуродив (лажно безумен), и со својата облека шетал, влечејќи ја по себе. На Светиот Василиј Велики му било кажано од страна на некои негови познати луѓе дека Светиот Ефрем е луд. А тој на тоа одговорил ,, Вие сте луди, тој е свет“.

Светиот Исак пак, е роден во Нинива и живеел во седми век. Тој се подвизувал и во Манастир близу тој град, кој бил наречен Матејски. Овој Светител правел чуда, па поради тоа бил приморан да го прифати светиот чин- епископ на Нинива. Но само по околу пет месеци го оставил светото епископство, и се посветил на монашкиот пустински живот. Неговото значење и неговата теологија се засновани на Божјата љубов и милост. Всушност, со верувањето и посветувањето на Господ, со потполното препуштање во Божји раце, тој бил и е пример за вистински подвижник.

Вербата во Господовата љубов и милост е извор на спасение. Овие двајца Светители се пример за дободетели и трпение. И токму такви се сите Светители, тие се столбови на Православната вера, и Господ пребива во нив постојано.

Затоа, прекрасен е Господ во Своите Светии.

Пишува Димитра Десановска

The post Сириските Светители Ефрем и Исаак first appeared on Кепенци.

Светиклиментовa поука за денот на зачетието на Пресвета Богородица

Editor — Tue, 07 Feb 2023 17:56:19 +0000

Да знаете, возљубени мои браќа, дека денеска го празнуваме зачнувањето на нашата Госпоѓа, чесната Владичица, Богородица.

Радосно да притрчаме кон нејзината Црква, на молитва со страв да стоиме, да ги отвориме вратите на божествената ложница со бденија и молитви; со милостиња и со постење и така да го поминеме чесно, со радост, чесното зачнување на пречистата Госпоѓа и пречистата Богородица, оти таа непрестајно го моли за нас својот син и наш Бог. Но не така што ќе јадеме и пиеме, туку бедните да ги пожалиме, гладните да ги нахраниме, голите да ги облечеме, како што кажал Господ

,,Бидете милостиви, како што е милостив Отецот ваш небесен“.

Затоа, да се угледаме на оние мудри девици, на кои Господ им рекол

,,Ќе влезете во небесната ложница дека ме помилувавте кога ме видовте како да сум туѓинец, гладен ме нахранивте, жеден ме напоивте“.

Дали, браќа самиот Христос Го напоивме или Го нахранивме, со тоа станавме достојно за Царството Небесно.

Да го споменеме големиот пастир Златоуст

,,О чеда, ова е за вас создадено, а не вие за него; и не се оттргнувајте од Црквата, ниту пак се поучувајте од суетните нешта“.

Затоа, возљубени мои браќа, да се увериме дека треба да одиме со чистота на молитва в Црква и на сите празници на нашиот Господ Исус Христос и Неговата Пресвета Мајка, нашата Владичица Богородица, да се приготвиме да слушаме: Пријдете, благословени од мојот Отец и наследете го приготвеното за вас Царство.

Угринова-Скаловска,Р. (1996).Климент Охридски- Поуки и похвали. Табернакул-Скопје

Изборот го направи Димитра Десановска

The post Светиклиментовa поука за денот на зачетието на Пресвета Богородица first appeared on Кепенци.

Блажена Ксенија Петроградска – Благодат скриена зад привид на безумие (АКАТИСТ)

Editor — Mon, 06 Feb 2023 23:30:07 +0000

Акатист на блажена Ксенија Петроградска – јуродива поради Христа

Кондак 1

Избрана угодничке поради Христа јуродива, света блажена мајко Ксенијо, која го избра подвигот на трпение и злопатење, пофална песна ти принесуваме почитувајќи го твојот спомен. Ти пак, заштити нѐ од видливите и невидливи непријатели за да ти воскликнеме:

Радувај се блажена Ксенијо, молитвеничке за нашите души!

Икос 1

Равноангелски живот си барала блажена мајко, по смртта на твојот маж, ја отфрли убавината на овој свет и сѐ што е во него: желбата на очите, желбата на телото и секојдневната гордост и со јуродивство Христов ум стекна. Поради тоа, услиши ни ја пофалбата која ти ја принесуваме:

Радувај се, со својот живот си еднаква на Св. Андреј Јуродивиот заради Христа!
Радувај се, од своето име се откажа и себе мртва се нарекуваше!
Радувај се, во јуродивството името на твојот маж Андреј го прими!
Радувај се, нарекувајќи се со машко име, од женските слабости се откажа!
Радувај се, својот имот на добрите и сиромашни луѓе го подели!
Радувај се, доброволно поради Христа сиромаштвото го прифати!
Радувај се, нас нѐ научи со твоето јуродивство да се оттргнуваме од суетната мудрост на овој свет!
Радувај се, блага утешителко на сите кои со молитва ти се обраќаат!

Радувај се блажена Ксенијо, молитвеничке за нашите души!

Кондак 2

Гледајќи го твојот необичен живот, бидејќи го презре својот дом и секое земно богатство, роднините по тело за безумна те сметаа, а луѓето на Петроград гледајќи ја твојата смиреност, мака и доброволно сиромаштво пејаа на Бога: Алилуја!

Икос 2

Дадениот ти разум од Бога во привидно безумие го скри, живееше во суетата на големиот град како пустињак, своите молитви непрестано на Бога вознесувајќи ги. Ние се восхитуваме на таквиот твој живот, пофално воскликнувајќи:

Радувај се, тешкиот крст на јуродивство од Бога даден на своите плеќи го понесе!
Радувај се, во привидно безумие сјајот на благодатта го криеше!
Радувај се, ти која дарот на прозорливоста со крајното смирение и молитвениот подвиг го стекна!
Радувај се, својот дар го покажа за корист и спасение на страдалниците!
Радувај се, човечките страдања прозорливо во непрегледна далечина ги гледаше!
Радувај се, на добрата жена за раѓањето на синот прорече!
Радувај се, на таа жена од Бога чедо измоли!
Радувај се, секој го научи на Бога со молитва да се обраќа!

Радувај се блажена Ксенијо, молитвеничке за нашите души!

Кондак 3

Со горна сила од Бога на тебе дарувана, жестината и лутиот студ храбро го поднесе распнувајќи го своето тело против страстите и похотите. Затоа просветлена со Светиот Дух повикуваш непрестано кон Бога: Алилуја!

Икос 3

Имајќи го блажена, небото за свој покров и земјата за своја постела, поради Божјото Царство се откажа од секое угодување на телото. Гледајќи го таквиот твој живот со умиление ти повикуваме:

Радувај се, земниот свој дом на луѓето го отстапи!
Радувај се, бидејќи го сакаше небесното живеалиште, и го прими!
Радувај се, немајќи ги земните блага во сѐ духовно се збогати!
Радувај се, со својот живот на трпение нѐ научи!
Радувај се, Божјата љубов на луѓето ја покажа!
Радувај се, украсена со плодовите на благочестието!
Радувај се, трпение и незлобливост кон светот покажа!
Радувај се, наша љубезна заштитничка пред Престолот на Севишниот!

Радувај се блажена Ксенијо, молитвеничке за нашите души!

Кондак 4

Разбранетата бура на животот во Петроград со кротост и незлобивост ја надви Блажена мајко, и бестрастие спрема трулежниот свет стекна. Затоа и пееме на Бога: Алилуја!

Икос 4

Слушајќи за тебе како страдаш поради Христа, тажните тешејќи ги, а немоќните крепнејќи ги, заблудените на прав пат ги изведе, измачениот народ кон твојата помош дојде, славејќи те:

Радувај се, ти која Христовиот пат со сето срце го засака!
Радувај се, ти која Христовиот крст радосно го понесе!
Радувај се, секој срам на светот, телото и ѓаволот го претрпе!
Радувај се, исполнета си со Божји дарови!
Радувај се, љубов кон ближите покажа!
Радувај се, на страдалниците утеха им пружи!
Радувај се, солзите на расплачените ги бришеше!
Радувај се, со благодатта на Светиот Дух чудесно си огреана!

Радувај се блажена Ксенијо, молитвеничке за нашите души!

Кондак 5

Како од Бога водена ѕвезда се покажа твојата светост, Блажена Ксенијо, која го осветлувала хоризонтот на Петроград. Луѓето кои гинеа во безумието на гревот им го јави патот на спасението повикувајќи ги да воскликнуваат на Бога: Алилуја!

Икос 5

Гледајќи ги твоите подвизи во молитвата, трпението на мразот и жестината, благочестивите души сакаа да го намалат твоето страдање, ти носеа облека и храна. Ти пак, на сите сиромашни сето тоа го раздаваше, сакајќи да го сочуваш подвигот. Ние пак, восхитувајќи се на доброволното твое сиромаштво воскликнуваме:

Радувај се, жегата и мразот поради Христа ги поднесуваше!
Радувај се, во молитва непрестано пребиваше!
Радувај се, Петроград со ноќни бденија од несреќи го оградуваше!
Радувај се, Божјиот гнев од него многу пати го одвраќаше!
Радувај се, секој ден во годината ноќе во полето се молеше!
Радувај се, рајската сладост во духот на сиромаштвото ја вкуси!
Радувај се, за таа сладост сѐ земно остави!
Радувај се, сета во Бога пребиваш!

Радувај се блажена Ксенијо, молитвеничке за нашите души!

Кондак 6

Ја проповедат светоста на твојот живот, Богоблажена, сите излечени од тебе од многуте болести, беди и грижи; богати и сиромашни, стари и млади. Затоа и ние славејќи те воскликнуваме кон Бога: Алилуја!

Икос 6

Засветли славата на твоите подвизи, Блажена мајко, кога ноќта на ѕидарите на Смоленската Црква тајно камења им носеше, олеснувајќи го нивниот напор. Од тебе водени и ние грешните воскликнуваме:

Радувај се, нѐ научи тајни добра да правиме!
Радувај се, кон подвигот на благочестието сите ги повикуваше!
Радувај се, помошничке на ѕидарите на Божјите храмови!
Радувај се, црквената светост ја засака!
Радувај се, нашиот труд на патот на спасението го олеснуваш!
Радувај се, брза помошнице на оние кои кон тебе прибегнуваат!
Радувај се, блага утешителко во сите грижи!
Радувај се, небесна застапничке на Петроград!

Радувај се блажена Ксенијо, молитвеничке за нашите души!

Кондак 7

Сакајќи да го избавиш од грижа расплачениот лекар, кој жената ја погреба, заповеда на некоја девојка да побегне во Охт и таму да си најде маж, и да го утеши. Направено е така, како што прорече. Тие пак во радост кон Бога воскликнуваа: Алилуја!

Икос 7

Ново чудо од молитвата покажа, Блажена мајко, кога на благочестивата жена ѝ рече: ”Земи ја копејката, ќе се угасне”. Со тоа ѝ го прорече пожарот во нејзниниот дом. По твојата молитва пламенот на огнот се изгасна. А ние водени од тебе, воскликнуваме:

Радувај се, ублажителке на човечките грижи!
Радувај се, покажа смелост пред Бога за страдалните!
Радувај се, неизгасена свеќо, во молитвите кон Бога силно гориш!
Радувај се, застапничке во бедите и нашите несреќи!
Радувај се, спасителко на опфатените од погибелни страсти!
Радувај се, благочестивите девојки од неверен брак ги враќаше!
Радувај се, избавителке од очајот на оние кои со клевети се навредени!
Радувај се, брза заштитничке на судот на неправедните!

Радувај се блажена Ксенијо, молитвеничке за нашите души!

Кондак 8

Бездомна патничке, го помина својот животен пат во престолниот град на нашата татковина во големо трпение, поднесувајќи грижи и навреди. Сега во Горниот Ерусалим пребивајќи радосно пееш на Бога: Алилуја!

Икос 8

На сите сѐ им беше, Блажена Ксенијо: утеха на загрижените, покров и заштита на слабите, радост на тажните, облека на бедните, исцеление на болните. Поради тоа ти воскликнувам:

Радувај се, ти која живееш во горните живеалишта!
Радувај се, ти која таму за нас грешните се молиш!
Радувај се, благиот хор за служење на Бога го објавуваш!
Радувај се, покровителке на понижените и прогонетите!
Радувај се, со своите молитви православните ги застапуваш!
Радувај се, заштитничке на навредените и оние коишто се молат!
Радувај се, укрепителке на навредените!
Радувај се, ги засрамуваш неверните и исмевачите!

Радувај се блажена Ксенијо, молитвеничке за нашите души!

Кондак 9

Секакви болести претрпе Блажена мајко, сиромаштво, глад и жед, уште и навреди од безбожните луѓе кои мислеа дека си безумна. Ти на Бога упорно се молеше воскликнувајќи Му: Алилуја!

Икос 9

Благоглаголивите беседници не можеа да разберат дека ти со своето безумие во светот сето безумие го разобличи и со својата немоќ ги засрами силните и мудрите. Не ја видоа во тебе Божјата сила и Божјата премудрост. Ние пак, кои твојата помош ја примаме ти пееме:

Радувај се, Носителке на Божјиот Дух!
Радувај се, со Апостолот Павле со немоќта своја се фалиш!
Радувај се, со твоето привидно безумие светот го разобличуваш!
Радувај се, поради спасение убавината на светот ја отфрлуваш!
Радувај се, небесните блага со сето срце ги љубиш!
Радувај се, на патот на спасението нѐ повикуваш!
Радувај се, страшните гревови на пијанството ги разоткриваш!
Радувај се, бесплатен и милостив лекар на сите си била!

Радувај се блажена Ксенијо, молитвеничке за нашите души!

Кондак 10

Сакајќи да ја спасиш душата, телото свое со страстите и похотите го распна, неповратно себе се отфрли, својот крст на плеќите го положи и Христа со сето срце Го следеше пеејќи Му: Алилуја!

Икос 10

Цврст бедем и неуништиво прибежиште си на оние коишто ти се молат, мајка Ксенијо. Поради тоа заштити нѐ од видливите и невидливи непријатели по своите молитви за да ти речеме:

Радувај се, нас на духовен подвиг нѐ поттикнуваш!
Радувај се, ти која од демонските замки нѐ избавуваш!
Радувај се, ти каден темјане на Бога принесен!
Радувај се, ти која мирот Божји во човечките срца го носиш!
Радувај се, ти која духот на злобата во озлобените го усмртуваш!
Радувај се, ти која на кротките деца благослов им даваш!
Радувај се, со тајната молитва од болеста нѐ исцелуваш!
Радувај се, на озлобениот свет Божјата мудрост ја покажуваш!

Радувај се блажена Ксенијо, молитвеничке за нашите души!

Кондак 11

Пофална песна ти принесуваат, Блажена Ксенијо, оние коишто со Твоите молитви се спасени од беди и грижи и сите напасти и заедно со тебе радосно воскликнуваат на Бога: Алилуја!

Икос 11

Осветлен со светлина се покажа твојот живот, Света мајко, која ги осветлува луѓето во овој животен мрак. Ти паднатите во провалијата на гревот ги избави и кон светлината Христова го насочи нивниот живот. Затоа ти говориме:

Радувај се, православните со Божјата светлина ги просветлуваш!
Радувај се, Христова угодничке која во небесниот свет си живеела!
Радувај се, во многуте маки голема благодат си стекнала!
Радувај се, во темнината на гревот со Божјата благодат светиш!
Радувај се, на очајните рака на помош им пружаш кон патот на спасението!
Радувај се, слабите во верата ги закрепнуваш!
Радувај се, духовите на злобата ги засрамуваш!
Радувај се, ти која со својот живот ангелите ги восхити!

Радувај се блажена Ксенијо, молитвеничке за нашите души!

Кондак 12

Изливаш изобилна благодат, Блажена Ксенијо, на оние коишто го почитуваат твојот спомен и притекнуваат кон твојот покров. Поради тоа и нас, кои на тебе се молиме источи ни од Бога река на исцеленија, за да воскликнеме: Алилуја!

Икос 12

Пеејќи за многуте твои чудеса, Блажена мајко те славиме и усрдно молиме: не нѐ оставај грешните во грижите, но помоли го Господ на силите да не отпаднеме од православната вера, туку во неа со тебе да се утврдуваме и воскликнеме:

Радувај се, нѐ научи да сострадуваме со страдалниците!
Радувај се, нашите немоќи усрдно ги прими!
Радувај се, нѐ научи на распнување на телото со страстите и похотите!
Радувај се, покровителке и посредничке на оние коишто го почитуваат твојот спомен!
Радувај се, тешкиот пат го помина!
Радувај се, со тоа се разубави за вечното спасение!
Радувај се, ги утешуваш оние коишто на твојот гроб се поклонуваат!
Радувај се, непрестано се заземаш за спасение на нашата земја!

Радувај се блажена Ксенијо, молитвеничке за нашите души!

Кондак 13

О, света блажена мајко Ксенијо, во твојот живот тешкиот крст го понесе. Прими го од нас грешните молењето кое ти го принесуваме. По твоите молитви заштити нѐ од замките на духовите на темнината и сите оние коишто зло ни мислат. Замоли го Седарежливиот Бог да ни даде сила и крепост за да секој од нас го зеде својот крст и појде по Христа пеејќи со тебе: Алилуја!

Икос 1

Радувај се, со својот живот си еднаква на Св. Андреј Јуродивиот заради Христа!
Радувај се, од своето име се откажа и себе мртва се нарекуваше!
Радувај се, во јуродивството името на твојот маж Андреј го прими!
Радувај се, нарекувајќи се со машко име, од женските слабости се откажа!
Радувај се, својот имот на добрите и сиромашни луѓе го подели!
Радувај се, доброволно поради Христа сиромаштвото го прифати!
Радувај се, нас нѐ научи со твоето јуродивство да се оттргнуваме од суетната мудрост на овој свет!
Радувај се, блага утешителко на сите кои со молитва ти се обраќаат!

Радувај се блажена Ксенијо, молитвеничке за нашите души!

Кондак 1

Радувај се блажена Ксенијо, молитвеничке за нашите души!

Молитва кон Светата Блажена мајка Ксенија Петроградска

О, света блажена мајко Ксенијо! Ти под засолништето на Севишниот живееше, пратена и закрепната од Богомајката, претрпувајќи глад, жед, мраз, жештина, навреди и гонења. Доби дар од Бога на прозорливост и чудотворство и под заштита на Семоќниот покој најде. Сега Светата Црква како миомирисен цвет те прославува. Стоејќи на местото на твојот погреб пред твојот свет лик, како жива, која си со нас, ти се молиме: прими ги нашите молитви и принеси ги пред Престолот на Милосрдниот наш Отец небесен, имајќи смелост пред Него измоли вечно спасение на оние коишто кон тебе притекнуваат, дарежлив благослов за добрите наши дела и намери и избавување од сите грижи и беди. Застапи се за нас со светите твои молитви пред престолот на Семилостивиот наш Спасител, за нас недостојните и грешните.

Помогни ни Света блажена мајко Ксенијо, децата со светлината на крштението да се осветат и со печатот на Светиот Дух да се запечатат, момчињата и девојките во верата, честитост и богобојажливост да се воспитуваат и успех во учењето да имаат; болните и слабите да се исцелат; семејна љубов и слога испрати; монасите удостој ги со добар подвиг да се подвизуваат и од навреди огради ги; пастирите во крепоста на Светиот Дух зацврсти ги; нашиот народ и земјата во мир и спокојство сочувај ги и сожали се на оние кои во предсмртниот час се лишени од Светите Христови Тајни. Ти си надеж, брзо услишување и избавување и тебе благодарсност ти вознесуваме и со тебе Го славиме Отецот и Синот и Светиот Дух, сега и секогаш и во вечни векови. Амин.

Втора молитва

Блажена мајко Ксенијо, прими ја оваа пофална песна од нас недостојните, сличните не на тебе туку на твојот маж Андреј во сѐ: од разврат, пијанство, среброљубие, немарност спрема вечното спасение и нечувствителност на Божјото предупредување и благост. И како што после смртта не го осуди и замрази, туку знаејќи каков подвиг е потребен за таква душа да се молиш, подвиг на јуродивство зеде, облекувајќи се во неговите алишта, себеси мртва се нарекуваше, а него жив, за да така барем го удостоиш на Божјата милост.

Така и нас Несебична, погледни и слушни ги нашите зборови: недостојни за небото и земјата, целите потчинети на гревот, незаштитени од нашите Ангели кои отстапија, недостојни на Божјиот Престол да помислиме, ти сочувствителна Ксенијо, надеж наша, од дното на очајанието нѐ подигаш и правиш да го направиме она што сеуште можеме; слушајќи од оние кои копејка ти дадоа, таа како благодат на нив им се врати, го направивме овој мал спомен на тебе од нашиот вишок, сакајќи и со другите да го поделиме. Смилувај се на нас бедните во секој поглед, Милостива, по твоите молитви дај ни олеснување на бремето на нашите прегрешенија и со смелост најпрво да го бараме своето отрезнување. Дај ни ја Подвижничке, помислата на смртта и стравот Божји да се вкорени во нас. Од вртежот на страстите, уживањата и разните светски опседнатости подигни нѐ. Чудотворко, направи да и ние непотребните од лево да свртиме на десно и заедно со православните браќа да доживееме дел од осветленоста на повиканите на Божествената Тајна Вечера.

Слушајќи за твојата голема милост, ние нескромните те молиме и за сите наши пријатели и за сите души кои во овој живот се изгубија и се предадоа себеси на светските соблазни во сенката на заборавот: демонската музика, дрогата, модата, непотребните науки и лажни учители, идеологијата, политиката и разните идоли. Сите како заблудени не наоѓајќи им вина, побарај и замоли од Добриот наш Пастир со тебе водени и со заземањето на Благословената наша Владичица Богородица да почувствуваат радост на преумување и нов живот.

И сите нас, секогаш смирена, научи нѐ на твојот подвиг на самозаборав и незнаење. Бидејќи навистина е приказната за нашиот Господ дека благослов од Отецот примаат и наследници на Царството постануваат само оние коишто заборавиле и не знаат кога и што добро и пофално направиле.

Знаеме дека нема да ја засрамиш надежта што во тебе ја положивме, туку умножи го твоето застапништво уште многумина со тебе заедно во сите денови на својот живот да Го слават Отецот и Синот и Светиот Дух сега и секогаш и во вечни векови. Амин.

Тропар

Засакувајќи го сиромаштвото заради Христа, сега се насладуваш на бесмртната трпеза, со привидното безумие безумието на светот го изобличи, со смирението крстната Божја сила ја прими. Поради тоа стекна дар на чудотворна помош, Ксенија блажена, моли Го Христа Бога да нѐ избави од секое зло преку покајанието.

Крај, слава и пофалба на Бога!

Превод од руски
Сестринството на Слепченскиот Манастир

The post Блажена Ксенија Петроградска – Благодат скриена зад привид на безумие (АКАТИСТ) first appeared on Кепенци.

Светиклиментова похвала на Успението на Пресвета Богородица

Editor — Thu, 02 Feb 2023 15:24:54 +0000

Еве го сега светлиот празник,
со радост пријдете,
возљубени,
да се насладиме на ова пречудно чудо,
отфрлајќи го мракот житејски,
да ги просветлиме нашите духовни очи и да се издигнеме со умот,
да го видиме пречудесното успение на Господовата мајка и учениците негови собрани како облак да го испратат пречистото тело на навистина пресветата и преславната владичица наша Богородица и секогаш Дева Марија.

Затоа што со неа се обнови снеможениот род човечки, со неа се отвори Едем, што во старо време го затвори прабабата Ева.
Со неа клетвата се разори, а благословот процути. И таму каде што смртта се всели, таму животот бесмртен излезе.

Зашто таа се јави од небо, донесувајќи му го Творецот и на небото и на земјата. Со неа се обожестви човештвото, кога беше положен Христос во нејзината пресвета утроба.

Угринова-Скаловска,Р. (1996).Климент Охридски- Поуки и похвали. Табернакул-Скопје

Изборот го направи Димитра Десановска

The post Светиклиментова похвала на Успението на Пресвета Богородица first appeared on Кепенци.

Богородица Млекопитателница

Editor — Wed, 25 Jan 2023 14:57:48 +0000

Денеска (25 јануари по новиот календар) се чествува иконата на Мајката Божја наречена Млекохранителка. Оваа икона е една од најстарите на светот и претставува една од најпочитуваните икони во Православието. По преданието, ја насликал Светиот апостол и евангелист Лука по благослов на Дева Марија.

На самата икона е претставена Мајката Божја – Пресвета Богородица која во рацете го држи младенецот Христос и го дои. Иконата е насликана односно е доказ за она што е напишано во Евангелието според Лука –

,,Блажена е утробата која те носела и градите од кои си се хранел “.(Лк 11,27).

Имено, Светиот Сава Осветен пред своето упокојување пророкувал пред монасите кои се беа собрале околу него, дека многу години подоцна ќе дојде човек односно монах од благороднички род, кој треба да донесе икона од Пресвета Богородица, и на кого треба да му го предадат неговиот игуменски жезол.

Речиси седум векови подоцна Светиот Сава (Српски) го посетил Манастирот. Монасите пак, не го заборавиле она што им било кажано како предание, како завет.

Пророштвото се обистинило.

Светиот Сава (Српски) земајќи ја иконата ја поставил на иконостасот во својата монашка ќелија, која му ја посветил на својот претходник и духовен отец- Свети Сава Осветен.

Оваа икона има чудотворна моќ уште многу одамна. Многу луѓе кои со љубов, вера и молитва застанале пред неа, добиле помош.

Иконата денеска се наоѓа во испосницата на Свети Сава, во Кареја, Света Гора. Мајката Божја ги услишува молитвите на сите кои со вера ќе ѝ пријдат, особено на бремените жени, мајките и доилките.

Нека Пресвета Богодорица нè чува!

За многу години!

Подготви Димитра Десановска

Од календарот на МПЦ-ОА 25 јануари / 12 јануари Празник на иконата „Млекопитателница“

Така се вика иконата на Пресвета Богородица којашто Св. Сава Српски ја донесе од манастирот на Св. Сава Осветен кај Ерусалим и ја положи во неговата Посница на Кареја на Света Гора. Вака се исполни пророштвото на Св. Сава Осветен изречено осумстотини години претходно, дека ќе дојде некој свештеник српски Сава и дека таа икона и неговиот жезол треба да му ги предадат нему. Кога тој ја посетил обителта на Св. Сава Осветен, монасите се сетиле на ова пророштво на основачот на својата обител и му ги предале иконата и жезолот. Оваа икона е поставена на десната страна од царските двери во Посница, а жезолот во една келија наречена Патерица, на Кареја.

Тропар

Со благоволение на Отецот, од Божествениот Дух бессемено си Го зачнала Синот Божји; Оној Кој постои од Отецот без мајка пред вековите, и заради нас без татко по плот Го родила, и како Младенец со млеко си Го хранела. Затоа, не престанувај да Го молиш, да ги избави од беди душите наши.

Македонска Православна Црква – Охридска Архиепископија, Јустинијана Прима

The post Богородица Млекопитателница first appeared on Кепенци.

Светиклиментово Слово за Благовештение – Преку Богородица се сруши прабабината клетва

Editor — Sat, 21 Jan 2023 19:00:35 +0000

И Исаија вели:

,,Ете, Девица ќе зачне и ќе роди син и ќе му стават име Емануил, што значи,, Бог со нас “.

И кога дојде време да се исполнат нивните зборови, го испрати Архангелот Гаврил и му рече нему ,,Оди кај Девицата Марија и кажи ѝ: ,,Радувај се Благодатна, Господ е со тебе. Ти си благословена меѓу жените и благословен е плодот на Твојата утроба. Веќе ти се сруши прабабината клетва: од жената процутеја сите зла и жалости, а сега пак од тебе, добрините. Оти, еве ќе зачнеш во утробата и ќе родиш син и ќе му ставиш име Исус.“

избор на Димитра Десановска

The post Светиклиментово Слово за Благовештение – Преку Богородица се сруши прабабината клетва first appeared on Кепенци.

Акатист на преподобниот отец Гаврил Велички

Editor — Thu, 12 Jan 2023 01:18:26 +0000

Акатист на преподобниот отец Гаврил Велички
нов Лесновски Чудотворец

Кондак 1

Просветлен од благодатта Христова, сотрудник на Ангелите, озарено чедо на Божјата Мајка, застапник на оние кои Он Ти ги дал, те прославуваме оче Гавриле и радосно ти воскликнуваме:

Радувај се, преподобен оче Гавриле, Лесновска пофалбо!

Икос 1

Ангелски својот живот на земјата го помина, блажен, засакувајќи го Бога од раната младост, со сето срце Му се предаде, и од љубов кон Него необични подвизи на себе зеде. А ние слушајќи за твоето натприродно живеење, го прославуваме Бога, Кој те прослави, и со трепет ти воскликнуваме:

Радувај се, миомирисен темјан на Исусовата молитва!
Радувај се, силен застапник на својата татковина!
Радувај се, во постот се уподоби на големиот Илија!
Радувај се, служител на Небесната Скинија!
Радувај се, со Божествената љубов страстите ги согори!
Радувај се, голема поука на монасите им остави!
Радувај се, над својот манастир непрестајно бдееш!
Радувај се, во срцата на верните тивка духовна радост вееш!
Радувај се, на непријателите свои им опрости!

Радувај се, преподобен оче Гавриле, Лесновска пофалбо!

Кондак 2

Кога ја виде жедта на твоето срце за Неговата Божествена љубов, свети оче Гавриле, Срцезналецот Господ, го устрои твојот животен пат, чувајќи те како зеница во своето око, неосквернет од пороците на овој свет, да можеш со чисти усни и срце да Му пееш Нему: Алилуја!

Икос 2

Се радува градот Штип, што изнедри од своите пазуви таква плодна фиданка, тебе, голем Божји угодниче Гавриле. Со својот праведен живот, Христовиот мирис низ својот народ си го излевал, православното пак учење, во своите дела си го преточувал. Се радуваме и ние што стекнавме таков силен молитвеник пред Бога, и иако невешти, сепак се осмеливме да ти ги вoзнесеме овие искрени пофалби:

Радувај се, благословен плоду, на твоите побожни родители!
Радувај се, од нивниот добродетелен живот, на благочестие се научи!
Радувај се, уште како мал разум на старец си пројавил!
Радувај се, со Христовите начела, мудроста на светот си ја мерел!
Радувај се, со мечот на стравот Божји, пијавиците на световните наслади ги отстрани!
Радувај се, од високите војни почести на светот се откажа!
Радувај се, во воена служба на Христос, твојот Бог премина!
Радувај се, големината на човековото достоинство ја покажа!

Радувај се, преподобен оче Гавриле, Лесновска пофалбо!

Кондак 3

Силата на Севишниот во тебе прекрасно се пројави, преподобен оче. Зашто иако слабо човечко тело на себе носејќи, ти со силите демонски храбро се соочи. Вооружан со постојан пост и молитва, со твоето смирение тешки рани си им нанел, воспевајќи Му на Оној Кој во тебе нив ги победува: Алилуја!

Икос 3

Малку ни се зборовите човечки да ја искажеме восхитната радост, како ти оче непрестајно стражарејќи над својот ум, дремка на своите очи не си им давал, и од земен војник, војник на Небесниот Цар си постанал. Знаејќи за твојата совесна служба во одбрана на твојот народ, и просветувањето на младите во вистински православен дух, ние уште повеќе го пофалуваме Твоето ревносно одење по Христа, и со радосни срца ти извикуваме:

Радувај се, земен ангелу и небесен човеку!
Радувај се, за нас немоќните непрестан молитвенику!
Радувај се, посведочи дека со пост и молитва овој род се истерува!
Радувај се, ракавица фрли в лице на оној кој не спие!
Радувај се, Христос, пред сé друго го стави, копнеејќи со сета душа за Него неа да ja оневестиш!
Радувај се, земната уметност препознавајќи ја како сенка, кон вишната за спасение на својата душа поита!
Радувај се, поривот на твојата душа во песни го излеа!
Радувај се, оставајќи го својот вајарски занает, својата душа во рацете на Небесниот Вајар ја положи!
Радувај се, од изобилието што светот ти го понуди, единственото потребно го избра!
Радувај се, наш многу сакан наставнику!
Радувај се, на воскресната радост вешт благовеснику!

Радувај се, преподобен оче Гавриле, Лесновска пофалбо!

Кондак 4

Бура на недоумици ни го смутува умот, како со пофалби да ги искажеме твоите неуморни подвизи и ревноста по Бога која во тебе од ден во ден се разгоруваше; претопувајќи се целиот во љубовта Божја, во самозаборав си Му пеел на Возљубениот: Алилуја!

Икос 4

Се радуваме на Божјата милост која врз тебе изобилно се изли, оче, на Божјата промисла која чувајќите од замките на духовниот пркосник, те доведе до Света Гора Атонска. Овде на чудесен начин те пречека Игуманијата, Пресвета Богородица и со умиление го благослови твоето доаѓање. Разбирајќи ја таквата благонаклонетост на Богомајката кон тебе, со стравопочит ти воскликнуваме, Божји угоднику:

Радувај се, светот и сé што е во него го остави и на Света Гора се насели!
Радувај се, ревносен учесник во црковните Богослужби!
Радувај се, светогорските монаси, како свои браќа искрено ги возљуби!
Радувај се, со смирение украсен, богатите плодови на послушанието ги вкуси!
Радувај се, туѓинец на земјата, кој ништо свое не си имал!
Радувај се, слава на монасите, и украс на испосниците!

Радувај се, преподобен оче Гавриле, Лесновска пофалбо!

Кондак 5

Како невидлив, меѓу браќата си престојувал, оче, секогаш во молитва пребивајќи, штедлив на зборови, а богат во дела, во скришната одаја на твоето срце Му воспевашe на Совршениот Бог: Алилуја!

Икос 5

Бура од непријателство на земните власти подигна мразителот на секое добро, кога го виде твоето добродетелно живеење, поттикнувајќи ги од светата Гора Атонска поради нивната острастеност да те истераaт; но Оној кој за сите промислува, на чудесен начин те заштити, за гонителите невидлив те направи. Затоа смирено ти воспеваме:

Радувај се, на земјата прогонуван, а на небесата од ангелите прославуван!
Радувај се, криејќи се во пештера од непријателите, пајакот заштитничка мрежа околу тебе исплете, и на тој начин, чудесно те заштити!
Радувај се, по заповед Божја во твоја заштита и змиите отровници застанаа!
Радувај се, искрен љубител на избраниот удел на мајката Божја!
Радувај се, твоето ,,Иже Херувими” уште во гората одекнува!
Радувај се, неуморно си ја прославувал Твојата Силна Помошничка!
Радувај се, зашто во Христа нема ни елини, ни евреи, ни бугари, ни срби, ни македонци, но сите ние сме едно во Христа Исуса!
Радувај се, виша пресметка со животот направи: јас и мојот брат едно сме!

Радувај се, преподобен оче Гавриле, Лесновска пофалбо!

Кондак 6

Како што пилињата итаат под крилјата на својата мајка, барајќи топлина, така и ти, оче Гавриле, си поитал под духовната закрила на старецот Татијан, за во неговото духовно гнездо благодарно да Му воспеваш на Неописливиот Бог: Алилуја!

Икос 6

Сакајќи во сé да Му угодиш на Бога, строго си се подвизувал, оче, и на твојот старец до смртта послушен си му бил, со трпение отсекувајќи ја својата волја, поучувајќи не и нас тврдокорните по срце, кои денес на твојот спомен со љубов се сеќаваме и пофалби ти принесуваме:

Радувај се, верен послушник на старецот Татијан!
Радувај се, послушанието како почеток на преобразување си го сфатил!
Радувај се, со смирение и кротост Божјата волја си ја прифатил!
Радувај се, овде благодатта Ликот Божји ти го долови!
Радувај се, со постојана Исусова молитва беснилото на умот си го стишувал!
Радувај се, со воздржание од телесна храна, страстите на телото си ги смирил!
Радувај се, со псалми, молитви и деноноќни славословија, благодатно душата своја си ја хранел!
Радувај се, по смртта на твојот старец за наследник на неговиот скит назначен!
Радувај се, во пештерата на скитот ,,Камена” топли созли пред Бога си лиел!
Радувај се, вивнат во висините на богомислието, за она што е во светот, ништо не си знаел!

Радувај се, преподобен оче Гавриле, Лесновска пофалбо!

Кондак 7

Преселувајќи се од место во место, манастирот свети Павле, како птица која долета, те пречека, свети оче, каде облечен во монашка риза, срце отвораше и воспеваше кон Троичниот Бог: Алилуја!

Икос 7

Не врзувајќи се за ништо на земјата, премудар оче Гавриле, со искрена вера и детско срце целосно се предаде на Божјата волја, носен од Духот Свети, се врати во твојата Македонија, каде последното место на твоето земно туѓинување, стана за нас прво место за наше поклонување кон Бога – Лесновската обител која Господ со тебе богато ја украси. Приоѓајќи кон Твоите свети мошти со солзи радосници силно шепотиме:

Радувај се, духовен светилик на земјата Македонска!
Радувај се, со светлината на твојот живот, многу души кон Изворот на жива вода приведе!
Радувај се, строг кон себе подвижнику, а кон ближните полн со милосрдие!
Радувај се, добар чувару на стадото Христово!
Радувај се, со оружјето на постот и молитвата, духовниот волк од него далеку си го истерувал!
Радувај се, многу загубени овци во Црковниот тор си вратил!
Радувај се, сострадален помошнику на неволните!
Радувај се, благодатен лекару на болните!

Радувај се, преподобен оче Гавриле, Лесновска пофалбо!

Кондак 8

Не се сокрива град што стои на врв планина, неговата светлина свети надалеку, ниту пак твоето богоугодно во Лесновскиот манастир престојување. Во сé угледувајќи се на твојот претходник, светиот пустиножител Гаврил, деноноќно на молитва си стоел, и милост за својот народ од Бога си просел, гледајќи умилно кон Бога, со подигнати раце повикувајќи: Алилуја!

Икос 8

Дознавме за чудесното исцелување на глувонемото дете Георгиј, кое по твоите усрдни молитви пред Бога, по завршувањето на Светата Литургија прозборе, како и за чудесното исцеление на детето кое пострада вo несреќата, зашто ти светителу, имајќи срце исполнето со љубов и сострадание кон ближните, си го умилостивувал Лекарот на душите и телата, да погледне кон немоќните свои чеда и да им подари време за покајание. Затоа голем наш добротвору, слушни ги овие восклици од недостојните усти:

Радувај се, уште додека беше на земјата Бог со чудеса те прослави!
Радувај се, лекарите од овој свет на вера во Живиот Бог ги научи!
Радувај се, бегајќи од човечката слава и суета, ризницата на своето срце со молчание и нестекнување си ја збогатил!
Радувај се, многумина од калта на гревот кон чистиот извор на Црквата Божја си привел!
Радувај се, по твоите молитви Бог неочекувано испрати дожд на земјата, и жителите на Лесново од сиромаштија ги сочува!
Радувај се, просветлен одозгора, сплетките на непријателот бргу си ги препознавал!
Радувај се, мудар раководителу на духовната паства!

Радувај се, преподобен оче Гавриле, Лесновска пофалбо!

Кондак 9

Страшен знак во вид на огнен столб од небесата се јави, на местото во храмот каде што ти на колена ја молеше Богомајката за целиот свет, Христов тајнику Гавриле. И до ден денес сведочи трагата од остатокот на небесниот пламен на секој кој со страв Божји влегува во Лесновското светилиште и на Бога му воспева: Алилуја!

Икос 9

Гледајќи ја посветеноста на твојата душа во Божјата служба, Светиот Дух во вишна служба те приведе, епископски омофор на рамена ти постави, огнен меч во рака ти достави, Милостивата во одбрана на народот те приведе, Ангелот пред тебе книга отвори – сам ти со од Бога дадената ти власт нас по име да не призиваш. Така тогаш, Велички Гавриле, со една рака човекот го прифаќаш а со друга неговата тегоба кон Бога ја испраќаш. Радувај се, и послушај:

Радувај се, верен слуго на Христос Седржителот!
Радувај се, со смирение епископскиот чин си го прифатил!
Радувај се, верен следбеник на Климента во грижата за паствата!
Радувај се, подржавател на Наума во молитвеноста!
Радувај се, од Прохора на странствување се научи!
Радувај се, Кирило Методиево слово ширеше!
Радувај се, Игуманијата Атонска во срце ја носеше!
Радувај се, подвижник меѓу епископите!
Радувај се, скриен наставник на монасите!
Радувај се, застапник и покров на бездомните!
Радувај се, брз помошник во неволјите!

Радувај се, преподобен оче Гавриле, Лесновска пофалбо!

Кондак 10

Голема благодат на Светиот Дух се изли врз твојата глава, блажен, зашто преку тебе, болни се исцелуваа, ожалостени се зарадуваа, осакатени од гревот на тесната патека кој води кон живот се враќаа, учејќи ги да Му пеат на Оној Кој тајно делува во своите слуги, Добротворот Бог: Алилуја!

Икос 10

Разбирајќи го духот на времето, паднатоста човекова и отклонувањето од учењето и напомените на Светиот Дух – нé потсети како треба христијанска душа пред Бога да се претстави. Веќе умрен за светот, уште присутен на земјата, преминот твој ти беше дојавен. Кочијата за душата поита да ја спремиш – четириесет литургии за себе отслужи, твоите духовни чеда ги утеши ветувајќи им дека иако заминуваш во Горниот Ерусалим, пак остануваш со нив. Благодарејќи на оваа примерна поука ние не можеме а да не ти воскликнеме:

Радувај се, имајќи ја за сопатничка помислата за смртта, ти од нејзиното осило не си се уплашил!
Радувај се, како за долгоочекувана средба со неа навреме си се подготвил!
Радувај се, ангелите на небесата го прославија твоето претставување!
Радувај се, жителите на Лесново видоа прекрасен оген столб над твојот гроб, во знак на твоето блажено упокојување!
Радувај се, после твојата смрт на твоето духовно чедо видот на очите му го врати!
Радувај се, притеснувајќи го своето тело со воздржание, на душата своја рајско насладување во вечните живеалишта и подготви!
Радувај се, твојата душа чиста како невеста, подготвена за Женикот ја украси!
Радувај се, на небесните жители радост, а на демоните жалост им донесе!

Радувај се, преподобен оче Гавриле, Лесновска пофалбо!

Кондак 11

Река на исцеленија извира од твојот кивот оче, во слава на нашиот Бог, и мноштво верен народ притекнува во Лесново на поклонение на твоите свети мошти, воспевајќи Му на Оној Кој таков застапник ни подари, пофална песна: Алилуја!

Икос 11

Од сите страни се слушна веста за новиот лесновски чудотворец, епископот Велички Гаврил. Оној кој целиот живот во тишината на молитвена осаменост, како невидлив во светот престојуваше, денес ги собира верните на духовна гозба во местото на својот подвиг, и сите оние кои за помош притекнуваат, исцеление на душевните и телесните слабости добиваат, вопевајќи му на преподобниот:

Радувај се, ново светило на Црквата, кое во мракот на соблазните од овој свет, патот на исправање ни ги покажуваш!
Радувај се, ѕвездо исткаена на облеката Христова, која благоизволи Неговите премрежја да ги носиш!
Радувај се, ние во тие премрежја препознавме гонење, шамарење, плукање, понижување на најмалиот Негов ученик!
Радувај се, вистинската Православна вера и после смртта, со прекрасни чудеса ни ја исповедаш!
Радувај се, со благопријатниот мирис од твоите мошти, силата на воскресението ни ја покажуваш!
Радувај се, на монасите од твојот манастир благодатна утеха им носиш!
Радувај се, учител на заблудените и благ вразумител на во грев паднатите!
Радувај се, каменот на нашите срца со пламенот на твоите молитви за нас, го топиш!

Радувај се, преподобен оче Гавриле, Лесновска пофалбо!

Кондак 12

Со умиление гледаме како покрај присуството на твоите мошти, стои гробот со натписот на твојот родител, монахот Кирил. Зашто ти, оставајќи го него заради Христа, ја придоби неговата душа, да му угодува на Бога во монашки чин и да Му пее непрестајно: Алилуја!

Икос 12

Божји слуга на земјата, пријател Христов на небесата, стекна слобода да се застапуваш и за нас грешните кои го почитуваме твојот свет спомен и со радост и љубов ти воспеваме:

Радувај се, преку твоите духовни списи на добродетели се поттикнуваме!
Радувај се, не учиш старите навики зад себе да ги оставиме и добар почеток на покајание да поставиме!
Радувај се, во денови на искушенија и болести кои нé снаоѓаат поради нашите гревови, со топли молитви пред Бога за нас се застапуваш!
Радувај се, по твојот пример многу боготражители во монашки чин на Бога му послужија!
Радувај се, возобновител на монашкиот дух во земјата Македонија!
Радувај се, нов Лесновски чудотворче и прозорливче!

Радувај се, преподобен оче Гавриле, Лесновска пофалбо!

Кондак 13

О, голем Божи угоднику, редок испосник и голем молитвеник за својот род, преподобне оче Гавриле, прими го нашето пофално пеење, кое иако свесни за својата недостојност, со љубов ти го принесовме. Помоли се за нас, твоите чеда пред Владиката Христос да не избави од соблазните на овој век, да не паѓаме во гревови кои нé оддалечуваат од Него, Изворот на љубовта, но обратени во покајание, со чисти облеки да го сретнеме на Небесата со ангелската песна: Алилуја!

Преподобен оче Гавриле моли Го Бога за нас!

Преподобен оче Гавриле моли Го Бога за нас

Икос 1

Радувај се, преподобен оче Гавриле, Лесновска пофалбо!

Кондак 1

Радувај се, преподобен оче Гавриле, Лесновска пофалбо!

Тропар на преподобниот отец Гаврил Велички, Светогорец

Од изворот на благодатта духовни дарови си нацрпил, и како пчела медоносна нектар од сите добродетели си наточил, со солзите нечистотијата на твоето срце си ја измил, свештеноначалниче Гавриле, нов Лесновски чудотворче, те почитуваме како голем подвижник и испосник меѓу епископите, наставник на монасите и исцелител на оние кои со вера заради тебе на Бога Му воскликнуваат: Алилуја!

Втор тропар

Глас 8

Светило на православието,
светол столб на подвижниците,
од Христа даруван со смирение,
оче Гавриле преподобен,
срцата на верните по твоите молитви за Христa се отвoрија
а Дародавецот преку тебе пројави мноштво чудотворства.
Радувај се ти пофалбо на пустиножителите,
собеседнику на ангелите,
и моли се за сите нас,
кои никогаш не нѐ остави.

Кондак на преподобниот Гаврил Велички

Распламтен од огнот на божествената љубов, си се издигнал на крилјата на добродетелите, Гавриле преподобен, а во длабочината на смирението си ја видел убавината на созерцанието Божјо, верен слуго на Вистинскиот Бог.

МОЛИТВА КОН СВЕТИОТ ПРЕПОДОБЕН ЛЕСНОВСКИ ЧУДОТВОРЕЦ ГАВРИЛ

Изгреа Сонце од Исток, ги распростре своите зраци, пламен фрли на земјата – го запали твоето срце, ја нахрани твојата душа. Ти очитe ги подигна кон небото и прозборе со Оној Кој тебе те озари: не само мене Господи туку и овие кои си ми ги дал, бидејќи без нив, очиве ќе бидат наведнати.

Тебе ти се обраќаме, преподобен оче Гавриле, бидејќи ти нé охрабри и нé повика да ти притекнуваме: научи нé по тебе да одиме, твоите стапки да ги следиме, кои водат кон Царството Божјо. Во Твоите пазуви да се криеме од нападите на нечестивите. На твоите рамења да блеснеме опфатени од твојот омофор. Преку твоите очи светлината да ја видиме без да се уплашиме, од твоите раце да бидеме предадени во прегратките на животот, по твоето застапништво, на Пречистата Божја Мајка, Пресвета Богородица на Која ти и послужи, и на Сите Светии населени во вечноста.
Амин.

Крај, Слава и Пофалба на Бога

The post Акатист на преподобниот отец Гаврил Велички first appeared on Кепенци.

Отец Серафим – Христос се роди за и ние да послужиме заради животот на другите

Editor — Sat, 07 Jan 2023 09:54:42 +0000

Дали ние ќе ја разбереме мудроста на Оној Кој СТАНА ЕДЕН ОД НАС, за да ни го покаже вистинското живеење, вистинското доживување на реалноста, вистинските големини на љубовта, која потекнува од симбиозата на надежта и верата, која излегува и се раѓа од соборноста и неразрушливоста на таа соборност, содржана во зборовите едно да сте како Ние што сме Едно (Јов. 17,21).

Постоењето на човекот поради неговата паднатост се манифестира во животот во овој свет преку неговото самољубие, а сега воплотениот Христос ни станува Пат, Вистина и Живот.

Треба само да Го следиме:

Патот на љубовта – секого да го возљубиш дури и повеќе од себеси;

Патот на вистината – човекот е создаден за вечност, малку нешта се квалитетни во животот за да им обрнуваме внимание, зашто сѐ е суета и ако е така, да се држиме до реалните вредности кои што одек имаат во вечноста;

Патот на животот – живи сме ако нашите дела имаат своја трајност и се проткаени со една мисла да послужиме во краткиот временски период, кој на земјава го нарекуваме живот.

Да послужиме до самозаборав, да послужиме надминувајќи ја смртта, значи со целото битие свое, заради животот на другите, кои не го разбрале самото служење. Ако така се преумиме, ние ќе го разбереме Христовото раѓање, односно Божјото воплотување и Неговата цел.

Христос се роди!

Интегралиниот текст од разговорот на отец Серафим од манастирот Свети Јован Претеча во Слепче за “Нова Македонија” можете да го прочитате на следниот линк:

The post Отец Серафим – Христос се роди за и ние да послужиме заради животот на другите first appeared on Кепенци.

длабоко - Кепенци

Акатист на преподобниот отец наш Наум Охридски чудотворец

Кондак 1

Икос 1

Кондак 2

Икос 2

Кондак 3

Икос 3

Кондак 4

Икос 4

Кондак 5

Икос 5

Кондак 6

Икос 6

Кондак 7

Икос 7

Кондак 8

Икос 8

Кондак 9

Икос 9

Кондак 10

Икос 10

Кондак 11

Икос 11

Кондак 12

Икос 12

Кондак 13

Молитва кон светиот Наум Охридски чудотворец

Молитва за угнетените од непријателите

Величание

Една метанија една солза – Длабок поклон на покајание

Но, што е постот?

Како да се постигне сево ова?

Што претставуваат метаниите?

Сириските Светители Ефрем и Исаак

Светиклиментовa поука за денот на зачетието на Пресвета Богородица

Да знаете, возљубени мои браќа, дека денеска го празнуваме зачнувањето на нашата Госпоѓа, чесната Владичица, Богородица.

Блажена Ксенија Петроградска – Благодат скриена зад привид на безумие (АКАТИСТ)

Акатист на блажена Ксенија Петроградска – јуродива поради Христа

Кондак 1

Икос 1

Кондак 2

Икос 2

Кондак 3

Икос 3

Кондак 4

Икос 4

Кондак 5

Икос 5

Кондак 6

Икос 6

Кондак 7

Икос 7

Кондак 8

Икос 8

Кондак 9

Икос 9

Кондак 10

Икос 10

Кондак 11

Икос 11

Кондак 12

Икос 12

Кондак 13

Икос 1

Кондак 1

Молитва кон Светата Блажена мајка Ксенија Петроградска

Втора молитва

Тропар

Светиклиментова похвала на Успението на Пресвета Богородица

Богородица Млекопитателница

Од календарот на МПЦ-ОА 25 јануари / 12 јануари Празник на иконата „Млекопитателница“

Тропар

Светиклиментово Слово за Благовештение – Преку Богородица се сруши прабабината клетва

,,Ете, Девица ќе зачне и ќе роди син и ќе му стават име Емануил, што значи,, Бог со нас “.

Акатист на преподобниот отец Гаврил Велички

Акатист на преподобниот отец Гаврил Велички нов Лесновски Чудотворец

Кондак 1

Икос 1

Кондак 2

Акатист на преподобниот отец Гаврил Велички
нов Лесновски Чудотворец