индија - Кепенци

Индија го сопре извозот на житарици – се очекува глобален ценовен бум на лебот?

Editor — Sat, 14 May 2022 07:20:02 +0000

Вториот најголем извозник на житарици на светот (по земјите околу црноморскиот басен, предводени од Украина Русија) Индија, реши да го забрани извозот на пченица, пченка и други житарици, откако цените на лебот и другите производи од жито во втората земја со најмногу жители на светот почнаа вртоглаво да растат.

За да ја спасат својата економија од инфлациони турбуленции, џиновски цени и недостиг на леб, индиските власти решија привремено да го забранат извозот на житарици.

Со оглед на обемот на производство и извоз, се очекува ваквата одлука на Индија да предизвика глобален ценовен шок на лебот и недостиг на жито и леб на светскиот пазар.

Се стравува дека најпогодени од ова ќе бидат земјите од Африка и дел од Азија, на кои им се заканува и опасност од глад.

The post Индија го сопре извозот на житарици – се очекува глобален ценовен бум на лебот? first appeared on Кепенци.

Индија – Унифицирани правила за граѓански брак и родова еднаквост

Editor — Sun, 01 May 2022 10:47:26 +0000

Во Индија, во која живеат големи различни верски заедници од сите светски конфесии, во моментов се применува закон за брак кој првенствено ги почитува и ги применува различните правила на различните вероисповести.

На пример, кај муслиманите, еден маж може законски да има повеќе жени, што често доведува до сложени и долги судски процеси при бракоразводните парници.

Премиерот Нарендра Моди, кој самиот е Хиндус со националистички политички бекграунд, вели дека во сите религии, не само кај Муслиманите од кои се очекуваат најжестоки реакции, има проблематични „моменти“ во однос на бракот, кои би се решиле со унифицирање на еден закон за сите – закон, кој би се засновал на исклучиво граѓански концепт, ослободен од верските практики и обичаи.

Граѓанскиот закон би се однесувал не само на бракот, разводот и наследувањето, туку на широка лепеза прашања поврзани со правата на жените, родовата еднаквост и сексуалната определба. Се смета дека носењето на ваков закон огромната мултикултурна и мултиконфесионална Индија, ќе направи огромен револуционерен скок, од традиционално, речиси феудално уредување на бракот и семејството, кон модерно граѓанско општество насочено кон родова еднаквост и т.н. ЛГБТ права.

The post Индија – Унифицирани правила за граѓански брак и родова еднаквост first appeared on Кепенци.

Бум на извозот на пченица од Индија

Editor — Fri, 29 Apr 2022 07:48:17 +0000

Приватните производители на пченица во Индија се изненадени, што за првпат по долги децении, немаат потреба од субвенциониран откуп на нивното производство од државата.

Приватните извозници годинава ја откупуваат пченицата директно од производителите, што освен зголемена добивка кај земјоделците, значи и голема заштеда во државниот буџет, од кој до лани се издвојуваа огромни средства за државен откуп на пченицата.

Ваквиот поволен раст на извозот на пченица од Индија се должи да глобалниот дефицит предизвикан од војната во Украина.

Пченицата од Индија главно се извезува во земјите околу Црноморскиот Басен, Канада и Австралија.

The post Бум на извозот на пченица од Индија first appeared on Кепенци.

ЕУ бара партнерство со Индија

Editor — Mon, 25 Apr 2022 08:50:40 +0000

Претседателката на Европската комисија, Урсула фон дер Лајен денес во Индија ќе разговара за продолжување на преговорите за Договор за слободна трговија и евентуална продажба на европско оружје.

Само една недела по посетата на британскиот премиер Борис Џонсон на Индија, европскиот интерес за втората според население најголема земја на светот (1,4 милијарди) се толкува како обид на Западот да ја одврати Индија од соработката со Русија.

И покрај актуелноста на војната во Украина и очекувањата на Европа целиот свет да се вклучи кон санкциите за економско изолирање на Русија, аналитичарите велат дека сепак, интензивното европско внимание кон Индија за барање партнерство, не е поради Русија туку поради Кина.

Европа се обидува да го балансира кинескиот раст, од како што се вели – безопасен бизнис партнер за трговија, во агресивен конкурент и противник кој ја зголемува и својата воена моќ и почнува да претставува глобална закана.

Оттука идејата Западот, односно ЕУ, со продажба на оружје, да ѝ помогне на Индија во јакнењето на нејзините воени капацитети и да ги обнови преговорите за Договор за слободна трговија кои беа прекинати во 2013 година, поради барањата на Индија за целосно укинување на царините за увоз за одредени индиски производи на европскиот пазар.

Се очекува Фон дер Лајен да побара од Индија и да го смени својот став околу Украина, откако земјата одби да ја осуди руската инвазија на 24 февруари.

The post ЕУ бара партнерство со Индија first appeared on Кепенци.

САД и Индија се согласија да не се согласуваат околу Украина

Editor — Tue, 12 Apr 2022 10:25:30 +0000

Дијалогот за геостратешко партнерство на највисоко ниво меѓу Вашингтон и Делхи продолжува и покрај одбивањето на Индија да заземе осудувачки став кон руската интервенција во Украина. И покрај тоа што американскиот претседател Џо Бајден го нарече ставот на Индија превртлив, а индискиот премиер Нарендра Моди продолжува да промовира дијалог за решавање на војната во Украина, САД и Индија заеднички соопштија дека ги продолжуваат разговорите за меѓусебна соработка на највиско ниво. По виртуелната средба Бајден – Нарендра ќе следи продолжување на разговорите 2+2 меѓу министрите за надворешни работи и за одбрана на двете земји.

Непланираната виртуелна средба на врвот, на барање на Белата Куќа според американската страна треба да доведе до продолжување на блиските односи меѓу САД и Индија кои изминатите години се оддалечиле и оставиле простор за Русија, поради тоа што САД се занимавале со други прашања. Соработката во трговијата, технологијата, образованието и безбедноста се на врвот на агендата, со акцент дека безбедносното партнерство е клучно за воспоставување на заеднички геостратешки безбедносен појас на Индо-Пацификот.

Високо на агендата се враќа и т.н. четирипартитен безбедносен пакт КВАД во кој освен САД и Индија, членуваат и Австралија и Јапонија.

The post САД и Индија се согласија да не се согласуваат околу Украина first appeared on Кепенци.