Графичарите од СОУ “Таки Даскало” печатеа на копија од древната Гутенберговата преса

Editor — Thu, 06 Oct 2022 10:02:47 +0000

Во рамките на вежбите и практичниот дел од часовите по стручните предмети во графичката струка од СОУ “Таки Даскало” Битола, учениците од I, II, и III година, профил графички техничар, образовните асистенти, како и одговорните наставници по графички стручни предмети Катерина Спасовска-Маурдева, Валентина Ристевска и Весна Мундишевска-Велјановска, на 4.10.2022 ја посетија книговрзувачката работилница “Книговез” и Националната работилница за рачно изработена хартија “Св.Наум Охридски” во Охрид.

Тука учениците имаа можност да ја видат уметноста и уникатноста во графичкиот занает.

Посетата се реализира со поддршка на директорот на СОУ “Таки Даскало”, Ристо Грујовски и Општина Битола.

Во работилницата “Книговез” се запознаа со постапките на рачната изработка на тврдо поврзување на нотесот од самиот почеток, па се до финален производ.

Имаа можност да ги видат и да ракуваат со приборот и алатите кои се користат во овој процес. На среќата и немаше крај, кога учениците добија готов графички производ изработен со сопствени раце.

Во Националната работилница за рачно изработена хартија, пак, ја видоа древната постапка за добивање на хартија, научија за специфичните карактеристики на суровините што се користат во овој процес и имаа чест да отпечатат на една од двете копии на Гутенберговата преса која се наоѓа во овој музеј, а другата во Блед, Словенија.

Продажните експонати во музејот пленеа со својата уникатност и оригиналност и беа добар пример како треба да се негува традицијата и уметноста.

Ваквата посета беше продуктивна и од претприемачки аспект бидејќи учениците имаа можност да видат и начини на заработка со голема креативност и, секако, примена на знаењата стекнати на часовите по графичките стручни предмети.

The post Графичарите од СОУ “Таки Даскало” печатеа на копија од древната Гутенберговата преса first appeared on Кепенци.

СОУ Таки Даскало – Креативни и отворени за нови ученици

Editor — Wed, 25 May 2022 09:07:09 +0000

Во СОУ “Таки Даскало” Битола, се одржа отворен ден, на кој деветто одделенците имаа можност да се запознаат со гимназиското образование и сите струки кои им ги нуди ова училиште.

Им беа презентирани гимназиското образование и билингвалната паралелка (македонско-англиска) што им нуди на учениците можност да учат и на англиски јазик, што полесно им ги отвора вратите да студираат на светските универзитети, а беа презентирани и седумте струки:

геолошко-рударска и металуршка (геолошко-рударски техничар),
сообраќајна (техничар за патен сообраќај и техничар за транспорт и шпедиција),
графичка струка (графички уредник-дизајнер/графички техничар и печатар/изработувач на визуелни апликации – дуално образование),
градежно-геодетска (градежен/архитектонски техничар),
текстилно-кожарска (техничар за дизајн на облека/техничар за изработка на облека),
угостителско-туристичка (хотелско-туристички техничар),
лични услуги (техничар за козметичка нега и убавина),

како и можностите што им ги нуди стручното образование за стекнување вештини за вработување и отворање на сопствен бизнис.

Новитет од оваа година е воведувањето и на дуалното образование во графичката струка во образовниот профил печатар, за што беше потпишан Меморандум за соработка со Печатницата “Киро Дандаро”, што ќе им овозможи на учениците практичната настава која ќе ја изведуваат во оваа компанија да им биде платена од страна на МОН, а ќе им биде загарантирано и вработување во Печатницата “Киро Дандаро” по завршувањето на средното образование. Дуално образование се планира да се воведе и во другите струки, затоа што тоа е иднината за стручното образование кое треба да продуцира стручни кадри кои ќе стекнуваат практични вештини во компаниите и ќе можат веднаш по завршувањето на средното училиште да се вклучат на пазарот на трудот.

– СОУ “Таки Даскало” им нуди на учениците широки можности за избор, според сопствените афинитети. Покрај квалитетно гимназиско образование и билингвална македонско-англиска паралелка, им нудиме и седум струки кои се дефицитарни на пазарот на трудот и ќе им овозможат на нашите ученици стекнување практични вештини и вработување по завршувањето на средното образование, а од наредната учебна година воведуваме и дуално образование во графичката струка во соработка со Печатницата Киро Дандаро

– истакна директорот Ристо Грујовски.

Во секторот градежништво, градежните компании имаат недостиг на градежни техничари кои се дефицитарни, а има потреба и од архитектонски техничари, а од следната учебна година битолски фирми ќе им доделуваат стипендии на учениците од градежно-геодетската струка.

РЕК Битола има постојана потреба од рударски техничари, каде учениците ја изведуваат и практичната настава, па им се нуди можност за брзо вработување во најголемиот рударско-енергетски комбинат во државата. Во Битола, како еден од туристичките центри во Македонија, исто така има недостиг на кадри во угостителскиот сектор, хотелско-туристички техничари, така што голема е можноста за вработување во хотелите, рестораните, туристичките агенции кои немаат квалификуван кадар, а имаат потреба од тоа.

Битола како колевка на графичкиот занает и со долгогодишна традиција во графичарството, исто така, има потреба од графички техничари, графички дизајнери, печатари, изработувачи на визуелни апликации, а струката нуди можности и за отворање сопствен бизнис, зашто графичкиот дизајн наоѓа широка примена. Исто така и текстилната струка и навлегувањето во тајните на модниот дизајн и дизајнирање, конструкција и изработка на модни креации, нуди можност за сопствен бизнис, како и секторот лични услуги козметичка нега и убавина, кој овозможува стекнување вештини за отворање на козметички салони за нега на лице и тело, фризури и шминка. Сообраќајната струка им нуди можности за вработување во приватни и државни институции, во МВР, во Царината, автошколи итн

На настанот, кој беше богато организиран, имаше и музички концерт испреплетен со драматизации, во кој учениците ги покажаа своите таленти за пеење, свирење, глума, цртање, радиодрама на англиски јазик која ја подготвија учениците од билингвалните паралелки, модна ревија на учениците од текстилната струка, со модели кои сами ги дизајнираа, а учесниците во модната ревија беа професионално нашминкани од учениците од струката лични услуги козметичка нега и убавина, а за гостите од основните училишта, учениците заедно со нивните родители, наставниците и другите вработени во училиштето, подготвија мултиетничка кујна со традиционални јадења, а учениците од угостителско-туристичката струка подготвија и посебна богата шведска маса која ја аранжираа и ги покажаа своите вештини.

Имаше и повеќе изложби, графичарите подготвија изложба на “Уметничка графика-сува игла”, изложба на ликовни дела и карикатури од уметничкиот актив, изложба на макети на индивидуални објекти, тродимензионални модели, проекти изработени во Auto Cad од градежно-геодетската струка, текстилците рачни изработки на модни додатоци, торби и накит, а гимназијалците изведоа хемиски и физички експерименти.

Подготви: Марија Младеновска-Димитровска

The post СОУ Таки Даскало – Креативни и отворени за нови ученици first appeared on Кепенци.

таки даскало - Кепенци

Графичарите од СОУ “Таки Даскало” печатеа на копија од древната Гутенберговата преса

СОУ Таки Даскало – Креативни и отворени за нови ученици