bugarija - Кепенци

Нема гаранции дека Бугарија нема да условува до недоглед

Editor — Fri, 06 May 2022 13:44:46 +0000

„Срамота е секој понеделник да го отвораме Уставот, тој е сувереноста, белегот на една држава. Ако Софија е сериозна, тогаш нека потврди дека ова ќе биде последно барање и дека, ако го исполниме, нема да постави друго“

– Стево Пендаровски
претседател на Македонија

The post Нема гаранции дека Бугарија нема да условува до недоглед first appeared on Кепенци.

Ако не може на магарето, на самарот ?

Editor — Wed, 27 Apr 2022 08:35:47 +0000

Полска и Бугарија се првите земји од ЕУ кои се соочија со целосно сопирање на испораката на руски гас од Газпром. Причината е нeисполнување на руското барање, купениот гас да се плаќа во руски рубљи.

Во случајот на Полска тоа воопшто не е изненадување, со оглед на гласноста на полските политичари во осудата на руската интервенција во Украина, што Москва го смета за отворено непријателство. Полска и без тоа, најави дека до крајот на годината самата планира да го раскине договорот со Газпром.

Блокадата на Бугарија, за некои е изненадување, особено поради фактот што земјата го имала подмирено долгот за гас за април, што ја прави една од поредовните партнери плаќачи на Газпром. Се оценува дека прекинот на испорака на руски гас во Полска, во еден дел ќе го погоди снабдувањето на Германија.

Во критичката јавност во некои земји од ЕУ, германското однесување во врска со Украина се оценува како дволично, затоа што германските политичари ги обедуваат помалите партнери од ЕУ самите да де откажат од рускиот гас, додека Германија нејзиното откажување го најавува како постепено – до крајот на годината, догодина …итн.

Во исто време, додека продолжува да користи руски гас, Германија е една од земјите која испраќа воена помош и поддршка во оружје за Украина. Најзачудувачка или сложена за анализа, е блокадата на рускиот гас за Бугарија. Не дека Бугарија не беше третирана од Москва како непријателска земја, особено по изјавите на бугарски политичари дека граѓаните треба да се откажат и од дел од платите за да ѝ помогнат на Украина, но зачудува фактот што преку блокадата на Бугарија која е транзитна земја, може да настрада снабдувањето со руски гас на Србија и на Унгарија, чии власти имаат „најмеки“ ставови во Европа во врска со руската инвазија во Украина, често оценувани и како „про-руски“.

Иако блокадата на Полска и Бугарија ќе се одрази на сите европски земји, сепак, фактот што тие, а не некои други повлијателни, се првите блокирани од почетокот на руските воените дејствија во Украина, целата сегашна ситуација како да наликува на народната поговорка – не може на магарето, па ајде на самарот.

The post Ако не може на магарето, на самарот ? first appeared on Кепенци.

Еврејска заедница – Бугарија да се извини за злосторствата, наместо да отвора центри со имиња на фашисти

Editor — Mon, 18 Apr 2022 11:14:50 +0000

Реакција по повод отворањето на бугарскиот културен центар “Ванчо Михајлов“ во Битола:

Еврејската зедница и Фондот на холокаустот на Евреите од Македонија се згрозени и навредени од името на новиот културен дом во Битола, кој носи име на потврден фашист и близок соработник со нацистите.

На 16.04.2022 година, Шабат и прв ден Песах, ден кога Евреите од целиот свет го слават празникот за ослободување од египетско ропство, највисоките бугарски претставници на власта – премиерот Кирил Петков, потпретседателот на државата Илијана Јотова, министерот за надворешни работи Теодора Генчовска, поранешниот министер за надворешни работи Захариева, и други, официјално го отворија бугарскиот културен центар “Ванчо Михајлов“ по името на докажан фашист, соработник на Павелиќ, Мусолини и Адолф Хитлер.

Овој чин претставува навреда за Евреите и е закана за човековите слободи и права, кршење на демократскиот карактер и вредностите на модерна Европа. Чин со којшто се загрозува мултикултурализмот. Класичен пример за непочитување и искривување на историјата. Еклатантен обид во таканаречената „заедничка историја“ на која инсистира Бугарија, таа да се претстави како ослободител, а не како фашистички окупатор кој во центарот за убивање Треблинка депортира 7.144 македонски Евреи или 98% од еврејската популација во тоа време. Обид да се минимизира улогата на Р. Бугарија во холокаустот и окупацијата на Македонија. Искривување на фактите од европската и светска историја за Втората светска војна. Чин којшто не е во духот на добрососедските односи помеѓу Северна Македонија и Бугарија.

Ние, наследниците на преживеаните од холокаустот нема да ги премолчуваме ваквите појави и бараме итно и неодложно:

– Во Собранието да се донесат измените на кривичниот закон, иницирани од Еврејската заедница во 2017 година, со кои ширењето на антисемитизмот, негирањето и искривувањето на холокаустот, глорификација на фашизмот и нацизмот, како и употреба на нивните симболи и поздрави да бидат казниви со закон;

– Да се поведе постапка околу правната издржаност културни и други центри, граѓански здруженија итн. да носат имиња по потврдени фашисти и докажани соработници на нацистите;

– Владата на Р. Бугарија да се извини за злосторствата и холокаустот направени од нивните претходници за време на Втората светска војна;

– Европската Унија и Европскиот парламент да го осудат ваквото поведение на Р. Бугарија.

Ние, Евреите од Република Северна Македонија, како и бројни македонски граѓани , имаме многу пријатели од Р. Бугарија, со којашто сакаме како соседи да живееме во мир и благосостојба.

Фашистичкото минато на Бугарија под водство на цар Борис III и останатите докажани нацисти од врвот на власта на Царска Бугарија во Втората светска војна не смеат да претставуваат пречка во градењето добрососедски односи втемелени на взаемна почит, пријателство и доверба.

Денешницата не смее да биде жртва на историјата, како што и иднината не смее да биде жртва на вистината.

Со почит,

Еврејска заедница во Р Македонија Фондот на холокаустот на Евреите од

Македонија

The post Еврејска заедница – Бугарија да се извини за злосторствата, наместо да отвора центри со имиња на фашисти first appeared on Кепенци.

Битола едногласно се изјасни против бугарските провокации и пропаганди во градот

Editor — Sat, 16 Apr 2022 13:54:49 +0000

По силно полициско обезбедување, легитимирање, па дури и претреси на поединци денес сепак се одржаа едногласни протести на кои членови на граѓански здруженија и сојузи, политички партии, претставници на црквата и битолчани кои самоиницијативно се придружија кон заедничкиот револт поради отворањето на т.н. бугарски клуб или културен центар кој го носи името на контроверзниот Иван Михаилов.

Битолчани отворањето на бугарскиот центар го доживеаја како провокација и пропаганда во прилог на тврдењето на бугарската официјална политика дека во Македонија живеат Бугари кои се репресирани и се плашат отворено да се изјаснат за својата етничка припадност.

Отворањето на центарот целосно финансиран од бугарската држава во срцето на Битола ги налути битолчани кои ги пречекаа гостите од Бугарија со транспаренти со кои се бара и почитување на правата на Македонците од оваа евро-атланска членка, согласно меѓународните конвенции.

Отворањето на центарот како ниту една друга политичка тема до сега ги обедини битолчани од различни политички определби и идеологии.

Во високата делегација предводена од премиерот Кирил Петков беа и министерката за надворешни работи Теодора Генчовска, потпретседателка на Бугарија Илијана Јотова, пратеничката Екатерина Захариева, па дури и Красимир Каракачанов.

За време на посетата низ цела Битола беше забележано големо присуство на полиција, неколку улици во центарот на градот беа целосно затворени, а обезбедена беше и целата траса до селото Кравари каде гостите од Бугарија слетаа со хеликоптер. Следна нивна дестинација е градот Охрид.

The post Битола едногласно се изјасни против бугарските провокации и пропаганди во градот first appeared on Кепенци.