Поради обилните врнежи што го зафатија Битолскиот регион, екипите на ЈКП „Водовод“ Битола се на терен и преземаат итни интервенции за прочистување на затнатите селски канали во село Кравари. Активностите се насочени кон навремено отстранување на наносите и овозможување непречен проток на водата, со цел да се спречат поголеми материјални штети и евентуални поплавувања на земјоделските површини и домаќинствата.
Од јавното претпријатие информираат дека состојбата постојано се следи и дека екипите ќе останат на терен сѐ додека не се стабилизира состојбата, апелирајќи до граѓаните за внимателност и соработка во услови на зголемени врнежи.
