ЗЛАТЕН КЛУБ - Кепенци

ДУЊА ИВАНОВА Е НАШАТА НАЈТРОФЕЈНА ВЕЛОСИПЕДИСТКА

Editor — Mon, 02 Sep 2024 09:43:22 +0000

Титулата ,,државен првак“ претставува највисокото признание во спортските кругови во текот на една календарска година.

Дуња Иванова, како претставник на Велосипедскиот клуб Енерџи од Скопје е годинешниот државен првак со освоени три први места на Државното друмско-ридско, Државното друмско – хронометар и Државното првенство во планински велосипедизам, а во организација и како дел од годишниот календар на Велосипедската федерација на Македонија.

Дуња Иванова е концертна пијанистка, наставничка, докторка на науки за естетика и државен првак во сите велосипедски дисциплини во кои се натпреварувала последниве три сезони.

Иванова магистрирала на вокално-инструменталниот оддел на Факултетот за музичка уметност во Скопје во класата по пијано, а магистрирала и докторирала на катедрата за естетика на Институтот за филозофија на Филозофскиот факултет во Скопје.

The post ДУЊА ИВАНОВА Е НАШАТА НАЈТРОФЕЈНА ВЕЛОСИПЕДИСТКА first appeared on Кепенци.

ВОЈНА – НЕВИДЛИВА, А СУРОВА

Editor — Sun, 24 Mar 2024 16:11:43 +0000

За промоцијата на книгата „Невидлива е војната“ од Маја Стела

Во време кога зборот „промоција“ се повеќе се врзува за тривијални моменти од нашето денешно изразито потрошувачко секојдневие, со значење на промоција на цени и производи на намаление и распродажба во трговски центри, или пак како промоција на политички кандидати, на нови функционери и чин на унапредување на работа – да се зборува за Промоцијата во контекст на едно од нејзините изворни и суштински значења – како јавно претставување уметност, нудење и препорака на благородната мисија на некој оригинален автор, е навистина ретко, а уште поретко присутно во медиумите.

Битолската поетеса, Маја Стела е една од ретките денешни ентузијастки, која во време кога модерната инстант-технологија сурово се пресметува со безвремените вредности, неуморно и упорно јуриша кон ветерниците, витешки бранејки го зборот како непотрошлив градежен материјал за споменици во вечноста.

Еден таков споменик, на едно „битолско време“ обележено со длабоко втиснат печат од личности, настани и специфични амбиенти во мигот, низ призмата на личниот впечаток и субјективното романтично носталгично видување на авторот, е најновата збирка поезија „Невидлива е војната“ од Маја Стела, која грчевито се обидува во дланките да ги задржи последните зрнца песок, што одамна истекле низ песочниот часовник на времето.

Рецензентката и промотор на книгата, Симона Петровска, во моќта на зборовите кои „низ искушенија трагаат по вистинскиот пат“ препознава „исцелителност на душата“, а промоторот Михајло Свидерски, во „интроспективноста и екстроспективноста“ на стиховите кои се навидум насочени локално и национално, согледува „универзални вистини“.

Старата турска поговорка „Колку јазици знаеш, толку луѓе вредиш“ совршено вклопена во идејниот економско-архитектонски и мултикултурен концепт на старата битолска чаршија (која како и сите други од тоа време е изградена во отоманскиот период) како обележје на типично битолскиот историски „менталитет“ втиснат во колективната меморија на градот, сурово болно се согледува во песната „Изнемоштена верност“, преведена на сите некогашни чаршиски јазици, во која тешката одлука на авторката да се „впука песот за да не се мачи“ болно одекнува како последен бунтовен крик од едно време и по едно време, кое се откажало од самото себе, но не и од верноста.

Хиперреалната суровост, како изблик на еден необично есенциран гнев, кој поетесата го насочила навнатре, кон многуте свои скриени лузни, но и се уште крвави, па дури и загноени, непреврзани рани од „војната“ која, нели – е „невидлива“, преовладува во речиси сите стихови од оваа книга, заедно со потрагата по посакуваниот мир, кој во овој случај, се поистоветува со просто престанување на болката.

Во сета оваа имплозија, среде спомените од зборови кои истовремено болат и лекуваат, Маја Стела го продолжува разговорот со себе, зад ѕидините на добро утврдената „тврдина за тишината“(табија за тевната), оставајќи си порака, на самата себе – „мила“, за некогаш во времето, кога со „нови коски“ ќе може да „љуби без да старее“.

И да се вратиме на профаната „промоција“ без која денес, ни безвремените дела, не можат да бидат обзнанети.

По промоцијата во опуштен амбиент во кафулето „Паладиум“ во Стаклената зграда во Битола на која зборуваа промоторите Михајло Свидерски, Симона Петровска и Билјана Граматковски, во тек е промоцијата на Пролетниот саем на книгата на платото пред Офицерскиот дом во Битола, каде можете да ја купите и „Невидлива е војната“ од Маја Стела, по цени…„на промоција“, заедно со другите изданија на битолската Издавачка куќа „Восток“.

Благој Шаклевски

The post ВОЈНА – НЕВИДЛИВА, А СУРОВА first appeared on Кепенци.

ФОТО-ИЗЛОЖБА: ДАЛИ СТЕ ПОДГОТВЕНИ ЗА ПЕЛИСТЕР?

Editor — Fri, 01 Mar 2024 12:19:47 +0000

Во автентичниот амбиент на Ротинско Езеро, на чист воздух, со топли напитоци, во атмосфера заокружена со звуци избрани од ди-џеј, во сабота на 2 март ќе се одржи изложба на фотографски визуелни проказни за Пелистер создадени од над 10 талентирани фотографи.

Абиентот во близина на с.Ротино, со уникатната природа и идиличните пејсажи е магичен простор за целосно уметничко доживување во кое посетителите визуелно ќе патуваат низ природата, во овој случај сместена во самата природа, во која граница ќе се само рабовите на созадените фотографии, а крајната перспектива во неограничената фантазија на набљудувачот.

Изложбата е резултат на реализираната обука за фотографи со Љубомир Стефановски во октомври минатата година, во рамките на проектот “ARE YOU READY FOR PELISTER?” (ДАЛИ СТЕ ПОДГОТВЕНИ ЗА ПЕЛИСТЕР?) на ПРЕДА Плус Фондација во партнерство со Здружението QR SOCIETY и се спроведува во рамки на Регионалната програма за локална демократија во Западен Балкан 2 – ReLOaD2, која е финансирана од Европската унија (ЕУ), а ја имплементира Програмата за развој на Обединетите нации (УНДП), кофинансиран од Општина Битола.

The post ФОТО-ИЗЛОЖБА: ДАЛИ СТЕ ПОДГОТВЕНИ ЗА ПЕЛИСТЕР? first appeared on Кепенци.

“Калеидоскоп на звукот” – хуманитарен концерт на Доминика и Симон Поповски

Editor — Wed, 24 Jan 2024 10:39:19 +0000

На 26ти Јануари во Офицерски- Битола , 19 часот, ќе се одржи “Калеидоскоп на звукот” – концерт на Доминика и Симон Поповски.

Главната идеја е да се биде хуман, а притоа и да уживаме во звукот на безвременските сонатни ремек дела. Сите средства ќе бидат донирани на Домот за доенчиња и мали деца – Битола.

На програмата се три сонати од норвешкиот композитор Едвард Григ, рускиот гениј Сергеј Прокофјев и францускиот бунтовник Клод Дебиси.

“Сите три сонати се динамични, носат во себе посебни стилски карактеристики, а се и технички и уметнички предизвик. Самите композитори се познати музички револуционери кои не биле љубители на правила, па така создале дела кои зрачат со живот.” вели дуото.

“Ние уживавме додека се подготвувавме со цел вие да уживате во крајниот производ, а притоа заедно да направиме некое добро дело и да изнудиме детска насмевка. Ве очекуваме во петок.” истакнува Доминика.

Билетите по цена од 200 денари може да се купат на https://kupikartizase.com/ или во Brothers Tobacco на Широк Сокак и во Т.А. Бела Роза

The post “Калеидоскоп на звукот” – хуманитарен концерт на Доминика и Симон Поповски first appeared on Кепенци.

QR PODCAST – Преку вештини до работа

Editor — Tue, 26 Dec 2023 16:39:00 +0000

The post QR PODCAST – Преку вештини до работа first appeared on Кепенци.

„ПРЕКУ ВЕШТИНИ – ДО РАБОТА” УСПЕШНА ЗАВРШНИЦА НА ПРОЕКТОТ QR ПРАКСА

Editor — Sat, 23 Dec 2023 11:01:06 +0000

Зошто во Битола со години недостигаат истите стручни кадри кои образованието секоја година ги „произведува“?

Како стручно обучените ученици и компаниите кои имаат потреба од нив да дознаат едни за други и да се спојат?

Што треба сите заедно како локална заедница и општество да преземеме за да го спречиме одливот на кадри кој правопропорционално го загрозува економскиот развој ?

По одговорите, во изминатите 6 месеци, заеднички трагаа активистите на Здружението за афирмација на дигиталната култура QR Општество од Битола, заедно со 300 ученици од СОУ „Таки Даскало“ Битола и 50-тина компании, потенцијални работодавачи, членки на Регионалната стопанска комора во Битола, со финансика поддршка од Европската унија во рамките на Програмата за засилување на граѓанската отпорност и проектот за Помош при обезбедување овозможувачко опкружување за граѓанските Организации.

На завршниот настан на проектот „База на вештини – QR Пракса“ во хотелот „Милениум“ на Широк Сокак, пред околу 100 присутни беа презентирани искуствата од проектот: – резултатите од оригиналното истражување – Анкета на 50 компании во врска со нивните искуства со практиканти, потреби од кадар и размислувања и визии за економскиот развој; – беше промовирана нова оригинална Интернет страна на која практикантите ќе се спојуваат со компаниите; и – беа претставени искуствата од обуките со учениците за стекнување на т.н. меки вештини за себепретставување и кариерно профилирање.

Паралелено со настанот кој беше пренесуван преку поткаст на Интернет во живо, на кој учениците на опуштен начин ги споделија своите искуства, средношколците се „разиграа” и со скенирање на своите персонализирани QR кодови и барањето на своите профили на Интернет Страницата www.baseofskills.org.mk, која преминува во владение на нивното училиште и допрва ќе се полни и надградува со нови ученички профили и компании.

Освен 80тина ученици и претставници на училиштето како главен партнер, на настанот присуствуваа и претставници на другиот партнер Регионалната стопанска комора, неколку компании, здруженија на граѓани, Агенцијата за вработување и Општина Битола.

Настанот заврши со поентата дека ова е една од најважните, ако не и клучна тема за планирање на економски развој на Битола и што е најважно, спречување или барем намалување на тенденцијата на иселување на младите стручни кадри од градот и од државата.

The post „ПРЕКУ ВЕШТИНИ – ДО РАБОТА” УСПЕШНА ЗАВРШНИЦА НА ПРОЕКТОТ QR ПРАКСА first appeared on Кепенци.

QR ПРАКСА – ПРАКТИКАНТСТВО – ПОТРЕБИ, ИСКУСТВА И ПРЕДИЗВИЦИ КАЈ РАБОТОДАВАЧИТЕ

Editor — Wed, 20 Dec 2023 15:22:00 +0000

The post QR ПРАКСА – ПРАКТИКАНТСТВО – ПОТРЕБИ, ИСКУСТВА И ПРЕДИЗВИЦИ КАЈ РАБОТОДАВАЧИТЕ first appeared on Кепенци.

ГОЛЕМ ИНТЕРЕС КАЈ БИТОЛСКИТЕ СРЕДНОШКОЛЦИ ЗА СТЕКНУВАЊЕ ВЕШТИНИ

Editor — Fri, 20 Oct 2023 22:55:44 +0000

Здружението QR Општество почна со кариерни обуки на учениците од стручните насоки

Во СОУ „Таки Даскало“ Битола започнаа обуките за т.н. „меки вештини“ во рамките на проектот БАЗА НА ВЕШТИНИ – QR ПРАКСА со кои се опфатени ученици од втора, трета и четврта година од претежно стручните насоки, кои во моментов на пазарот на трудот се сметаат за дефицитарни.

Всушност, смислата на проектот е намалување на разликите меѓу потребите кај стопанствениците кои, според статистиките, се постојано „гладни“ за кадри кои стручните училишта постојано ги произведуваат, но сепак, стотиците завршени стручно оспособени матуранти не ги пополнуваат слободните работни места.

– Покрај продолжувањето на студии на други места и напуштањето на градот и државата, една од причините зошто бизнис секторот и кадрите од стручните училишта, сепак не се поклопуваат е – НЕДОСТИГОТ ОД ПРАКТИЧНО ИСКУСТВО и непоседување на т.н. „меки вештини“ кој освен конкурентниот капацитет на пазарот на трудот, ја намалува и самодовербата и мотивацијата кај учениците да бараат работа за струките за кои се школувале – вели Проф. д-р Анита Ангелевска, која е еден од тематските експерти која пред учениците ја предочи суштината на проблемот и можните решенија, какво што впрочем решение е и самиот проект QR ПРАКСА – БАЗА НА ВЕШТИНИ кој во својата завршна фаза има за цел преку Интерактивна интернет страница, да овозможи „поле“ за спојување на работодавачите со средношколците – практиканти.

Училишниот психолог м-р Марија Младеновска Димитровска, која во рамките на своите професионални активности во училиштето е секојдневно со учениците, се согласува дека нессодветното или некомплетно изведување на училишната пракса, се провлекува како системски проблем кој ја продлабочува разликата меѓу понудата и побарувачката на работна сила од струките застапени во училиштето „Таки Даскало“.

– Се работи за специфична адолесцентска возраст, во која на младите луѓе во денешното метежно време им е потребно соодветно кариерно насочување, помош при обликувањето на личниот професионален профил, надоградување на вештините кои во делот на струката се стекнуваат емпириски, преку практична работа, а во делот на профилирање на личноста – преку вештини за презентирање на себе си на пазарот, преку форми како што се ЦВ, мотивациско писмо, резиме, настап на интервју за работа… или едноставно есенцирано пополнување на сопствениот профил на Интернет, каков што е и примерот со тековниот проект во кој на Интерактивната интернет страница, учениците ќе имаат можност самите да го креираат својот QR Профил. – вели тематскиот експерт м-р Марија Младеновска Димитровска.

Во првите модули од обуките во изминатите неколку дена беа опфатени околу 100 ученици, од проектираните 300, колку што е целната амбиција на проектот. Замислата е , нивните вештини и податоци да бидат внесени на посебна изработена Интернет страница преку која со примена на QR код брзо, лесно и ефикасно ќе се поврзат со 50тина фирми од приватниот сектор кои имаат потреба од практиканти

За целта на проектот, Здружението QR ОПШТЕСТВО веќе потпиша Меморандуми за соработка со Регионалната Стопанска Комора Битола како претставник на работодавачите и со СОУ „Таки Даскало“ Битола кои изразија подготвеност активно да го овозможат и поддржат реализирањето на овој проект.

Проектот на Здружението за афирмација на дигиталната култура QR Општество од Битола, кој се реализира во рамките на „Механизмот на Европската Унија за Граѓанска Отпорност“ e поддржан од Европската Унија, а имплементиран од CPM Конзорциумот од Естонија, е замислен да ја поттикне комуникацијата меѓу бизнис секторот и учениците во средните стручни училишта во Битола, кои се обучуваат во струки кои се сметаат за дефицитарни според Агенцијата за вработување и Регионалната Стопанска Комора.

The post ГОЛЕМ ИНТЕРЕС КАЈ БИТОЛСКИТЕ СРЕДНОШКОЛЦИ ЗА СТЕКНУВАЊЕ ВЕШТИНИ first appeared on Кепенци.

Кога убавината се прелева во вистина – Наградата Ацо Шопов за „Убавите жени” на Зоран Пејковски

Editor — Tue, 07 Feb 2023 12:19:46 +0000

Книгата „Убавите жени” од Зоран Пејковски, како целина нуди една заокруженост со јасна тематска преокупација и идеја, фокусирани на убавината како универзална човечка димензија и дека таа изобилува со впечатливи поетски слики поместени во сферите на љубовното, еротското, чувственото. Низ целата книга се разлева топол лирски склад кој потсетува не само на класичното и на традиционалното, туку и на пеење што ги задоволува узусите на модерната поетика.

Збирката е цврсто структурирана во четири поетски циклуси што взаемно се надополнуваат и надградуваат: „Икона на универзумот“, „Сѐ би било еднолично сиво“, „Последното чудо на светот“ и „Епилог на убавината и вистината“. Во првиот циклус Пејковски смело поаѓа во „разгатка на убавината“ при што убавината на жената ја зема како симбол во кој се отелотворени убавината на универзумот и на природните феномени што често нѐ оставаат без здив со својата дива, но животворна и животообновлива убавина: сонцето, месечината, океанот, молскавицата или капката роса. Вториот циклус ги проширува и продлабочува истите со опевањето на смислата што жената му ја дава на постоењето и животот.

Песните во него се суптилно еротизирани и химнично ја слават љубовта меѓу жената и мажот како создателен чин исполнет со возвишена радост и хармоничност, сo исконска возбуда и страст. Во третиот циклус поетот се сосредоточува врз поетско толкување на „чудото на жената“, на високо естетизирање на нејзината надворешна појава и убавина што го опчинува мажот како што Адама го опчинила убавината на Ева, но и го внела во темнината на гревот. На тој начин поетот во овој циклус загатнува повеќе религиозно-филозофски прашања што на книгата ѝ даваат уште една, дополнителна поетска димензија. Во четвртиот, завршен циклус, поетот врши премин од поимањето на убавината како чисто екстерна естетска категорија кон нејзиното поимање (и) како етичка категорија.

Песните се „повнатрешнуваат“, па така надворешната убавина се рефлектира во добрината и вистината, сѐ со цел да се постигне романтичарскиот идеал за совршена убавина кој е сочинет од складниот спој помеѓу овие две категории, па следствено – убавината се прелева во вистина, како што вистината зрачи со убавина. Затоа овие песни дишат во поинаква, доминантно рефлексивна атмосфера, како што впрочем и доликува на еден поетски обликуван епилог.

„Убавите жени“ на Пејковски е стихозбирка со складен и затоа навидум лесен поетски израз што изобилува со богати поетски слики и метафори, како и со свежи звуковни и ритмички решенија. Поетот вешто ги избегнува замките на благуњавиот лиризам и сентиментализам што е постојана закана за ваков вид поезија и иако на моменти се приклонува кон нешто полесни, клишеизирани решенија, сепак општо земено, целата книга импонира со својата компактност, читливост и приемчивост.

Со доделувањето на наградата „Ацо Шопов“ за 2022 година на Зоран Пејковски и на неговата поетска книга „Убавите жени“, ДПМ се придружува кон прославата на 100-годишнината од раѓањето на истакнатиот македонски поет Ацо Шопов.

Комисијата избрана за доделување на годишната награда „Ацо Шопов“ на ДПМ за најдобра поетска збирка во 2022 година, во состав Зоран Анчевски (претседател), Мерсиха Исмајлоска и Славе Ѓорѓо Димоски (членови) на два состанока ги разгледаа книгите од годинашната поетска продукција пристигнати на конкурсот и по подолга и образложена дискусија Комисијата го сведе својот избор на три поетски збирки, неведени по азбучен ред според презимињата на авторите:

1. „Убавите жени“ од Зоран Пејковски
2. „Кадуцеј и лира“ од Сузана В. Спасовска
3. „Позлатено распетие“ од Ивица Челиковиќ

Членовите на Комисијата и дадоа предност на книгата „Убавите жени“ од Зоран Пејковски.

Зоран Пејковски е македонски драмски писател, драматург, сценарист, поет, прозаист, публицист, театролог и единствен натуралист во македонската литература. Член е на Друштвото на писателите на Македонија од 1995 година, а во 2018 година се стекнува со титулата европски писател на поезијата и уметноста, која ја доделува Номинациската комора за награди од Брисел при Европската Унија. Пејковски е и доцент од областа драматургија на Факултетот за театарски уметности при интернационалниот универзитет „Европа прима“ од Скопје. Автор е на над 20 драмски дела, потоа над 20 збирки песни, еден роман, четири научноистражувачки книги од театрологијата и над 50 дела од областа на научната мисла, на литературната критика и на рецензии за книжевни дела и театарски изведби. Добитник е на повеќе домашни и странски награди и признанија.

The post Кога убавината се прелева во вистина – Наградата Ацо Шопов за „Убавите жени” на Зоран Пејковски first appeared on Кепенци.

Волонтерско признание за Здружението “ВИКТОРИ”

Editor — Mon, 05 Dec 2022 17:40:30 +0000

Волонтерите и волонтерството во секоја држава претставуваат огромен човечки потенцијал кој континуирано се мобилизира согласно потребите на заедницата. Вредноста која волонтерите ја создаваат и вградуваат во своите активности е „бесценета“, бидејќи поседува особен квалитет кој е збогатен со хуманата димензија на добрата волја – вели младата Викторија Брдаровска од Здружението за заштита од повеќе аспекти “ВИКТОРИ”.

Здружението “ВИКТОРИ” по повод Светскиот ден на волонтерството 5 декември доби плакета од Општина Битола како една од петте најдобри организации кои во годината што изминува спроведоа волонтерски акции. Плакетата ја врачи градоначалникот на Општина Битола, Тони Коњановски.

Претседателката на оваа здружение, Викторија Брдаровска се заблагодари пред присутните и рече дека признанието е резултат на работа и на ништо друго, ветувајќи дека од идната пролет ова здружение уште посилно и поангажирано ќе работи за доброто на заедницата.

The post Волонтерско признание за Здружението “ВИКТОРИ” first appeared on Кепенци.