По три години посветена работа, ЕКТЕР – Битола со гордост објавува дека нашата едукативна кампања за намалување на пушењето „Кажи НЕ на пушењето“ годинава реализираше ново, уште поважно поглавје и тоа низ основните и средните училишта во целата држава.
Во фокусот на оваа фаза од кампањата се и наставниците – оние кои секојдневно влијаат врз младите и имаат потенцијал да станат вистински амбасадори на здрави избори. Во текот на изминатите години, преку посетата на над 30 училишта, околу 1000 ученици учествуваа во интерактивни работилници, но клучен двигател на процесот беа токму наставниците кои активно се вклучија, учеа нови пристапи и ги поддржаа учениците во разбирањето на ризиците од пушење.
Наставниците, предводени од нашата наградувана наставничка – Весела Богдановиќ – беа инспирација, поддршка и пример. Нивната улога не завршува со работилницата – тие се тие што ќе продолжат да го шират концептот на здрава средина без тутун и да ја одржат пораката жива во секојдневната работа со учениците.
Како резултат на работилниците, создаден е Прирачникот за борба против пушење – алатка наменета токму за наставниците, со едукативни игри, активности и методи за интегрирање на темата во редовната и воннаставната работа. Прирачникот е достапен и на турски и албански јазик, со цел наставниците да добијат поддршка и ресурси за спроведување на анти-пушачки активности во своите заедници.
Кампањата „Кажи НЕ на пушењето“ не би била можно да се реализира без поддршката од Програмата за директна помош (DAP) на Амбасадата на Австралија во Белград.
Веруваме дека наставниците се столбот на промената. Со нивната вклученост, со нивниот пример и со нивната посветеност, можеме да изградиме идни генерации кои ќе го изберат здравиот животен стил и ќе кажат НЕ на пушењето.
Ги повикуваме сите наставници ширум државата да се приклучат и да станат амбасадори на оваа национална акција!
Кажи НЕ на пушењето – започни од своето училиште!
Ти си промената што ја очекуваме!
Се вели во соопштението на ЕКТЕР – Битола по повод 31 Мај – Меѓународниот Ден за борба против пушењето.
