Излезе од печат првата книга за ЦРКОВНОТО КНИЖЕВНО НАСЛЕДСТВО НА СЛЕПЧЕНСКИОТ МАНАСТИР од АКАДЕМИК ЃОРЃИ ПОП-АТАНАСОВ
Во неа, од страна на академикот Ѓорѓи Поп-Атанасов е направена археографска презентација со факсимили на голем дел на ракописните книги пишувани во најзначајниот и најбогатиот скрипториум на Охридската архиепископија.
![](https://www.kepenci.mk/wp-content/uploads/2023/11/0-02-05-00278146151e2d557eccc8f5ce05295cea85d1a78f2f9fe1f345ece10a2cdcd6_865047727877ef8c-1024x682.jpg)
Овој труд содржи 14 поглавја во кои се опфатени повеќе векови творештво, од најстарите сочувани Слепченски ракописи, пергаментни и хартиени ракописи, Слепченски поменици, ракописите од поедини слепченски книжевници како Висарион, Пахомиј, Матеј, Сисој и др. до ракописи од XVII век, и старопечатни црковни книги.
![](https://www.kepenci.mk/wp-content/uploads/2023/11/0-02-05-bfc60e4f55f0d654056c36adf762daf00507fb365ba0dc9ff845494230cc1a1e_c8bb12ccada708fd.jpg)
“Сето ова црковно книжевно наследство ќе биде претставено во ова мошне значајно, репрезентативно издание, со што ќе се даде значаен придонес за афирмација на Слепченскиот Манастир како духовен, книжевен и уметнички центар. Од особена важност е што во минатото Слепченската света обител била ставропигијален манастир на Охридската архиепископија и во неговиот скрипториум се пишувани црковни книги за потребите на соборната црква во Охрид, порачувани од Охридскиот архиепископ.”
– вели во рецензијата проф. д-р. Лилјана Макаријоска дописен член на МАНУ.