Т.н. „ново нормално” предизвикано од мерките и последиците од ковид пандемијата, продолжува да создава конфузија во авио-превозот, кој мака мачи повторно да застане на здрави нозе.
И додека Австралиската авио-компанија „Квантас” соопшти дека по три години загуба, кризата предизвикана од ковидот заврши, националните британски и американски компании продолжуваат со драстично намалување на летовите и откажување на постоечките.
„Бритиш Ервејз” на пример, уште сега откажува речиси 16% од летовите за ноември, што во оваа индустрија е огромна бројка. Сличен е примерот со „Американ Ерлајнс” кои од почетокот на годинава откажаа над 30 илјади летови. Недостигот на персонал, најмногу на пилоти, сега е главниот проблем кој создава главоболки во секторот. Австралиски „Квантас” еден период преживуваше со прераспоредување на своите високорангирани службеници на пониски позиции, како што е утовар, истовар и бележење на багаж.
Малите, евтини авиокомпании од типот на Рајанер и Визер, се жалат на нелојално однесување на аеродромите и големите национални превозници поради непринципиелнoто откажување на линиите, со тврдење дека немаат доволно аеродромски персонал за толкав обем на летови.
Засега нема прецизна статистика колку пилоти, кој се специфичен и незаменлив кадар, умреле за време на пандемијата, а колку од нив останале привремено или трајно онеспособени за летање како последица на постковид синдромот, но судејќи според откажувањата, тој број е алармантно голем.
