Овој Велигден, како никогаш до сега, низ целиот свет се подготвуваат традиционалните украински Писанки – вапсани велигденски јајца со орнаменти од пчелин восок, кои се продаваат како симболична замена за донации за помош на настраданите од војната во Украина.
Tаканаречените Писанки, кои буквално значат писанија на јајце, по аналогијата дека цртежот во православната традиција е (Слово) писание, аналогно на живописот, иконописот, фрескописот итн. оваа типично украинска традиционална уметност е поврзана со боењето и украсувањето јајца за најголемиот христијански празник Велигден.
Забранети од комунистите за време на владеењето на Советскиот Сојуз, украинските Писанки никогаш не престанале тајно да се цртаат, скришно од властите кои поради практикувањето на верската традиција казнувале и со затвор и прогонство. Традицијата е денес обновена и се изучува дури и на универзитетите по етнологија и применета уметност.
За цртањето на геометриски форми слични на везовите од народните носии, се употребува чист пчелин восок со специјален „молив“ игла со која се нанесува на површината на јајцето пред боењето.
Писанките годинава, во местата зафатени со војна речиси и да не се подготвуваат, во многу места во Украина нема ни да се прослави Велигден, но затоа има експанзија на изработка на Писанки низ целиот свет, во знак на поддршка кон сите Украинци кои поради воените метежи морале да ги напуштат своите домови.
