Во денешно време да си јавна личност значи ризик од изложување на себеси пред суровиот суд на непрофилираната, често променлива „јавност”. Кај нас, речиси и да не постои успех кој не бил мерен, премеруван, суден, релативизиран или оспоруван, како страшен „грев” кој нема да ви го простат.
![](https://www.kepenci.mk/wp-content/uploads/2023/01/8-18.jpg)
Дунавка Трифуновска македонската јавност ја запозна пред сѐ како физички убава девојка, манекенка која како Мис Гранд на светот, не само што ја претстави туку и меѓународно ја испромовира својата земја Македонија.
Но, Дунавка е фармaцевт, интелектуалец со европска диплома, жена со интегритет која добро и многу точно знае што сака да постигне во животот, и смислено и плански ги остварува своите цели. Ѝ пречи големата поделеност во јавноста за сѐ и сешто и има јасен и аргументиран став за тоа што недостига за модата кај нас за да излезе од ограничените локaлни рамки.
Без трачеви, приватни пикантерии и сензации, со една поинаква Дунавка разговаравме во рубриката Анфас.
Уште како девојче сте ја засакале модата и модната писта. Како се случи тоа? Како се случи љубовта, како Дунавка ја привлече сето тоа?
– Љубовта кон модата ми ја пренесе мојата мајка која е прва генерација на југословенски манакенки. Повеличенствено е кога љубовта се раѓа во домот. Кога бев мала, живеев во царството на накитот, чевлите и шминките на мајка ми, го дишев нејзиниот парфем и истото тоа царство го соѕидав во мојот дом.
![](https://www.kepenci.mk/wp-content/uploads/2023/01/1-29.jpg)
Што треба да поседува една млада девојка, па и манекенка за да биде успешна и претпознатлива?
– Мх, искрено многу девојки денес сакаат да бидат успешни, што за мојата генерација беше апсолутно непознато, бидејќи во времето кога јас бев девојче и девојка беше важно да се заврши факултет и се тоа беше многу безгрижно. Јас добро ги следев сите модни списанија што ги носеше мајка ми од странство, бидејќи често патуваше, а имавме и добри македонски модни списанија кои беа предуслов за добра едкукација, и едкукатори од Белград, Софија и Лондон. Денес е сосема поинаку. За успехот треба многу фактори, ама и среќна ѕвезда, која секогаш ќе застане на страната на Сонцето за да не биде ничија сенка.
![](https://www.kepenci.mk/wp-content/uploads/2023/01/2-29.jpg)
Дунавка е фармацевт. Што претставува за Вас образованието?
– Во моето семејство медицината е традиција, бидејќи и мојата мајка и брат се доктори, па се надополнуваме во приказната. За фармацијата ја послушав мајка ми, која секогаш велеше дека тоа е сигурна и дамска професија, бидејќи двете нејзини најдобри другарки беа фармацевтки кои многу ми помогнаа во едукацијата, а и потоа. Денес имам европска диполома, доволно искуство и бројни пријателства кои чекаат вистинска приказна.
![](https://www.kepenci.mk/wp-content/uploads/2023/01/10-14.jpg)
Секогаш сте убава, позитивна, иако често наидувате на коментари од јавноста, кои не се секогаш добри. Што успева да Ве смири или да направи да се чувствувате своја?
– Благодарам. Јас жалам што во нашата земја се создаде огромна поделба на луѓето по различни основи, без разлика дали зборуваме за партиска, национална, верска припадност, а да не зборувам за материјалите разлики. Во таа секојдневна хистерија за успех ќе слушнете и доживеете се, ама не ве помнат луѓето по коментарите на социјалните мрежи. Ве помнат по тоа колку сте биле храбра и своја.
![](https://www.kepenci.mk/wp-content/uploads/2023/01/3-28.jpg)
Пред неколку години гордо ја носевте титулата Мис Гранд на светот. Како гледате на тоа искуство од денешна преспектива?
– Искрено долго време се мислев дали да ја прифатам титулата, бидејќи бев едиствена девојка од Балканот. Но, по неколку разговори со првите луѓе на организацијата донесов одлука и денеска тоа е најдоброто нешто што ми се случило во животот. Верувале или не. После изборот бев во повеќе од дваесет земји, запознав извонредни луѓе и заедно создадовме проекти кои останаа запаметени.
![](https://www.kepenci.mk/wp-content/uploads/2023/01/mis-grand-.jpg)
Сте имале можност да посетите голем број држави. Имате ли омилена дестинација?
– Белград ми е во срцето и чува многу спомени, но секогаш кога се враќам во Италија каде две години настапував за Академијата Италијана и во прв ред ме следеа Вивиен Вествуд, Фенди и Мисн, ми се оствари сонот за кој копнеев како девојче.
![](https://www.kepenci.mk/wp-content/uploads/2023/01/11-11.jpg)
Како го поминувате слободното време?
– Многу тешка борба извојував за да имам слободно време и да се посветам на себе си. Најчесто го поминувам во пешачење, обожавам да пешачам, да пијам кафе и да ги шетам моите миленици.
![](https://www.kepenci.mk/wp-content/uploads/2023/01/kucinja.jpg)
Сте ја посетиле и Битола повеќе пати. Како се чувствувате при таквите посети? Ве плени ли битолскиот шмек?
– Битола ме освои на прв поглед. Она што ме привлече беше љубовта на битолчани кон модата и страста за дотерување. В диско одат сите без разлика на годините и тоа ги прави засекогаш млади.
![](https://www.kepenci.mk/wp-content/uploads/2023/01/20-6.jpg)
Дали жолтиот печат влијае на Дунавка, на нејзините постапки, на нејзиниот живот?
– Не, секоја “олуја” е добредојдена.
![](https://www.kepenci.mk/wp-content/uploads/2023/01/5-22.jpg)
Во каква состојба е модата во Македонија? Што мислите, отворени ли се кепенците за младите надежни манененки?
– Модата во Македонија е недовршена приказна на која и треба смисла на постоење. Неединството и генерацискиот јаз како и неспособноста за компромис ја прави локална. Тоа е недозволиво. Модата е цивилизависка вредност а и бизнис на крајот од денот кој не смее да биде локален. Треба да се надминеме себеси, а со компромис се останато е возможно.